मधेशका मुख्यमन्त्री यादवले भोलि २ बजे विश्वासको मत लिने

जनकपुरधाम । मधेसका मुख्यमन्त्री सरोज यादवले बुधबार विश्वासको मत लिनु हुने भएको छ । मुख्यमन्त्री यादवले मंगलबार पत्रकार सम्मेलन गर्दै भोलि दिउँसो २ बजे विश्वासको मत लिने बताउनुभएको हो।

प्रदेश प्रमुखको कार्यालयबाट पत्र प्राप्त भएको जानकारी दिँदै उहाँले भन्नुभयो, `बुधबार दिउँसो २ बजेसम्म विश्वासको मत लिनेछु ।’

उहाँले विश्वासको मत लिनको लागि प्रदेशसभा सचिवालयलाई पत्र पठाउन लागेको बताउनुभयो।

मुख्यमन्त्री यादवले आफूलाई प्रदेशसभा सदस्यहरूले सहयोग गर्ने विश्वास समेत व्यक्त गर्नुभयो। सोमबार साँझ सर्वोच्च अदालतले मुख्यमन्त्री यादवलाई २४ घण्टाभित्र विश्वासको मत लिन परमादेश जारी गरेको थियो ।