कोरियामा नेपालीलाई शरणार्थी भिसा लिन उक्साउने गतिविधिप्रति दूतावासले गम्भीर ध्यानाकर्षण

काठमाडाैँ । कोरियामा नेपालीलाई शरणार्थी भिसा लिन उक्साउने गतिविधिप्रति दूतावासले गम्भीर ध्यानाकर्षण भएको जनाएकाे छ।नेपाली राजदूतावास सउल, गणतन्त्र काेरियाले मंगलबार एक सूचना जारी गर्दै शरणार्थी भिसा लिन उक्साउने गतिविधिप्रति ध्यानाकर्षण भएको जनाएकाे हाे ।

विभिन्न बहानामा पैसा असुल्ने र नेपाली नागरिकलाई शरणार्थी बन्न उक्साउने गतिविधि पूर्णतः अवैध रहेकाे दूतावासले जनाएकाे छ । सबै नेपाली नागरिकहरूलाई शरणार्थी भिसा (G-1) भिसा नलिन दूतावासले अनुरोध गरेकाे छ।

नेपाली राजदूतावास सउल, गणतन्त्र काेरियाद्वारा जारी सूचनामा भनिएकाे छ, ‘दक्षिण कोरिया सरकारले अन्तर्राष्ट्रिय सुरक्षा, मानव अधिकारको रक्षा वा अत्यावश्यक कानुनी तथा मानविय परिस्थितिको विशेष अवस्थामा मात्र प्रदान गर्ने शरणार्थी भिसाका लागि हालै उचित योग्यता वा आधार बिना नै झुठा कागजात तयार गरी गलत तरिकाले शरणार्थी आवदेन गर्ने क्रम बढ्दै गएको र कोरिया जान चाहने नेपाली नागरिकहरूलाई लक्षित गर्दै केही व्यक्तिहरू तथा समूहहरू टिकटक,फेसबुक, युट्युब लगायतका सामाजिक सञ्जालमार्फत नेपालीलाई शरणार्थी भिसा प्रवृत्ति सम्बन्धि भ्रामक, गैरकानुनी र प्रलोभनपूर्ण विज्ञापन मार्फत अवैध भिसा व्यापारमा सक्रिय भएकोप्रति दूतावासको गम्भीर ध्यानाकर्षण भएको छ। नेपाली नागरिकको हित, सुरक्षा र प्रतिष्ठाको संरक्षण दूतावासको प्राथमिक जिम्मेवारी रहेकाे सूचनामा उल्लेख गरिएकाे छ ।