११ औँ राष्ट्रिय महाधिवेशन विचार, दिशा र नेतृत्व निर्माण गर्ने ऐतिहासिक तथा निर्णायक मञ्च : लेखराज भट्ट

काठमाडौं। नेकपा एमालेका सचिव लेखराज भट्टले पार्टीको ११ औँ राष्ट्रिय महाधिवेशन विचार, दिशा र नेतृत्व निर्माण गर्ने ऐतिहासिक तथा निर्णायक मञ्च रहेको स्पष्ट गर्नु भएको छ ।

प्रेस चौतारी नेपालले म‌ंगलबार काठमाडौंमा आयोजना गरेको साक्षात्कार कार्यक्रममा बोल्दै उहाँले महाधिवेशन तयारीका सबै जिम्मेवारीहरू तीव्र गतिमा अघि बढिरहेको जानकारी दिनुभयो । उहाँका अनुसार मञ्च, खाद्य तथा प्रचार व्यवस्थापन समितिहरूले आ–आफ्नो प्रगति विवरण पेस गरिसकेका छन् । ‘तयारी लगभग पूरा भइसकेको छ, बाँकी रहेका कामहरू पनि अन्तिम चरणमा पुगेका छन्,’ उहाँले बताउनुभयो ।

खाद्य व्यवस्थापनको प्रमुख जिम्मेवारीसमेत सम्हालिरहनुभएका सचिव भट्टका अनुसार हजारौँ प्रतिनिधि तथा सहभागीहरूलाई सुव्यवस्थित सेवा–सुविधा उपलब्ध गराउने तयारी निरन्तर अघि बढिरहेको छ । नेतृत्वप्रति आकाङ्क्षा तथा इच्छाहरू महाधिवेशनको स्वाभाविक प्रक्रिया भएको उल्लेख गर्दै उहाँले यही प्रक्रियाबाट पार्टीको भावी दिशा र नेतृत्व तय हुने स्पष्ट पार्नु भयो । हालै सम्पन्न विधान महाधिवेशनले राष्ट्रका भावी प्रधानमन्त्री तथा पार्टी अध्यक्ष दुवै पदका लागि केपी शर्मा ओलीलाई नै अनुमोदन गरिसकेको तथ्य स्मरण गराउँदै उहाँले विचार र सिद्धान्तको आधारमा नेतृत्व चयन हुने बताउनुभयो । साथै, देशले भोगेको जेनजी आन्दोलनको गम्भीर समीक्षा आवश्यक रहेको उहाँको टिप्पणी छ । ‘उद्देश्य, लक्ष्य बुझ्न आवश्यक छ, ऐतिहासिक रूपमा सही मूल्याङ्कन हुनुपर्छ,’ उहाँले भन्नुभयो ।