फागुन २१ मा निर्वाचन हुनैपर्छ : शेखर कोइराला

काठमाडौं। नेपाली कांग्रेसका नेता डा. शेखर कोइरालाले आगामी फागुन २१ मा निर्वाचन हुनैपर्ने बताउनुभएको छ।

प्रजातन्त्रको जग निर्वाचन भएकाले कांग्रेस पार्टी निर्वाचनमा जान आतुर रहेको कोइरालाको भनाइ छ ।

आफ्नो निर्वाचन क्षेत्र मोरङ-६ अन्तर्गत सुन्दरहरैंचा नगरपालिका-४ का स्थानीय नेता/कार्यकर्तासँगको भेटघाट कार्यक्रममा बोल्दै कोइरालाले निर्वाचनका लागि जुट्न पनि पार्टी पंक्तिलाई निर्देशन दिनुभयो।

‘संविधान बचाउने र मुलुकलाई संक्रमणबाट जोगाउने निर्वाचनले मात्रै हो’, कोइरालाले भन्नुभयो,‘हामी त निर्वाचनको मिति कुरेर बसेका छौं तर सरकारको तयारी हेर्दा निर्वाचन हुनेमा आशंका समेत जन्मिएको छ ।’

सरकारले निर्वाचनको वातावरण बनाउन नसकेको उहाँको भनाइ थियो । ‘दलका केही नेतालाई काठमाडौंबाहिर जान दिइएको छैन, लुटिएका हतियार बाहिर छन्, कैदीहरू बाहिर छन्, यसबारेमा सरकारले के सोचेको छ ?’, कोइरालाले प्रश्न गर्नुभयो।