१५औं महाधिवेशनमा कांग्रेस महामन्त्रीमा लड्ने प्रदीप पौडेलको घोषणा

काठमाडौं।  नेपाली कांग्रेसका नेता प्रदीप पौडेलले १५औं महाधिवेशनमा महामन्त्री पदमा उम्मेदवारी दिने तयारीमा रहेको बताउनुभएको छ।

बिहीबार काठमाडौँको धुम्बाराहीमा सञ्चारकर्मीहरूसँग कुरा गर्दै आसन्न महाधिवेशनमा आफू महामन्त्रीभन्दा तल र त्यसभन्दा माथिको पदमा उम्मेदवारी दिने तयारी नगरेको बताउनुभयो।

‘१४औं महाधिवेशनमा महामन्त्रीमा विजयी हुन सकिनँ । १५औं महाधिवेशनमा म महामन्त्रीभन्दा तल र माथिको पदमा उम्मेदवारी दिने तयारीमा छैन । महामन्त्रीकै तयारीमा लागेको छु’ उहाँले भन्नुभयो ।

उहाँले आफू यही समूहको महामन्त्रीको उम्मेदवार हुने भन्ने खुलाउनुभयो। ‘महामन्त्री नै लड्ने भएपछि सभापतिकै सेट मिलाएर पक्कै लडिन्छ,’ उहाँले भन्नुभयो, ‘तर, अहिले नै यो समूहबाट लड्ने भन्ने टुंगो लागिसकेको छैन ।’

पौडेलले समय अभाव भन्दै महाधिवेशन पर धकेल्ने काम गरिएको पनि आरोप लगाउनुभयो। ‘अहिले समय अभाव भनेर लम्ब्याउने प्रपञ्च गरियो,’ उहाँले भन्नुभयो, ‘यसमा मुख्य नेतृत्वको दोष छ।´