कुलमानको उज्यालो नेपाल र जनार्दननिकट प्रलोपाबीच एकताको तयारी

काठमाडौं। ऊर्जा, भौतिक र शहरी विकासमन्त्री कुलमान घिसिङको पहलमा खुलेको उज्यालो नेपाल पार्टी र तत्कालीन माओवादी नेता बाबुराम भट्टराई, जनार्दन शर्मा, सुदन किराती, सन्तोष परियार लगायतको पहलमा खुलेको प्रगतिशील लोकतान्त्रिक पार्टीबीच एकता हुने भएको छ ।

स्रोतका अनुसार आइतबार भएको वार्तामा एकीकृत पार्टीको भावी प्रधानमन्त्रीको उम्मेदवारको रुपमा घिसिङलाई अघि सार्ने सहमति भएको छ ।

यसअघि कुलमान नेतृत्व ऊज्यालो नेपाल पार्टी राष्ट्रिय स्वतन्त्र पार्टीसँग पनि एकताको तयारीमा थियो । तर, रास्वपामा विलय हुने गरी नजाने निर्णय गरेको थियो । शनिबार कुलमान घिसिङको उज्यालो नेपाल पार्टीको केन्द्रीय समिति बैठक बसेको थियो, जसमा कुलमान आफैले रास्वपाको प्रस्ताव स्वीकार गर्न नसकिने बताउनुभएको छ।

शनिबार दिउँसो १ बजेदेखि साझ ५ बजेसम्म बौद्धको एक होटलमा बसेको उज्यालो पार्टीको बैठका संरक्षक समेत रहेका ऊर्जामन्त्री कुलमान घिसिङले रास्वपाको प्रस्तावबारे ब्रिफिङ गर्नुभएको थियो। घिसिङले सभापतिमा रवि लामिछाने, वरिष्ठ नेतामा कुलमान घिसिङ र प्रधानमन्त्रीमा बालेन शाहलाई अघि सार्ने प्रस्ताव आएको जानकारी दिनुभएको थियो । तर बैठकले यो प्रस्तावलाई अस्वीकार गर्‍यो ।

शनिबार राती अबेरसम्म काठमाडौं महानगरपालिकाका मेयर बालेन शाहसँग पनि घिसिङले वार्ता गर्नुभएको थियो। राति ७ बजेदेखि शाह र घिसिङविच भइरहेको वार्तामा रास्वपाका सभापति रवि लामिछाने पनि मिसिनु भएको थिएन । तर अन्तिममा रवि र शाहविच एकता भएपनि घिसिङसँग कुरा मिल्न सकेन ।

त्यस लगत्तै आयतबार प्रगतिशील लोकतान्त्रिक पार्टीसँग वार्ता भएको थियो । प्रलोपाका एक नेताका अनुसार दुई दलका प्रतिनिधिबीच आजै दुई चरणमा छलफल भएको छ । छलफलमा भावी प्रधानमन्त्री घिसिङलाई अघि सार्ने सहमति भएको ती नेताको भनाई छ । ‘सम्भवत आजै निर्णय हुनेछ’ ती नेताले भने ।