विशेष महाधिवेशन पक्षधरको अडान : तत्काल विशेष महाधिवेशन अघि बढाऊ, अरू विकल्प छैन

काठमाडौं । नेपाली कांग्रेसका महाधिवेशन प्रतिनिधिहरूले पार्टी विधानअनुसार विशेष केन्द्रीय महाधिवेशन तत्काल आह्वान गर्न माग गर्दै पुनः दबाब बढाएका छन् । पार्टीको विशेष राजनीतिक परिस्थितिमा संगठन सुदृढीकरण, आन्तरिक लोकतन्त्र मजबुत बनाउने र समसामयिक नीति निर्माणका लागि विशेष महाधिवेशन अपरिहार्य भएको उनीहरूको भनाइ छ ।

पार्टीको १५औँ महाधिवेशन तोकिएको समयसीमाभित्र सम्पन्न हुन नसकेकोले अब विशेष महाधिवेशनबाहेक अन्य कुनै विकल्प बाँकी नभएको उनीहरूको भनाइ छ । पार्टी विधानको धारा १७ उपधारा (२) बमोजिम गत २९ असोजमा देशभरका २४८८ जना अर्थात् ५४ प्रतिशतभन्दा बढी महाधिवेशन प्रतिनिधिहरूले हस्ताक्षरसहित विशेष महाधिवेशनको माग गर्दै केन्द्रीय कार्यालयमा निवेदन दर्ता गराएका थिए ।

विधानअनुसार बहुमत प्रतिनिधिबाट माग आएपछि केन्द्रीय कार्यसमितिले निर्धारित समयभित्र विशेष महाधिवेशन आह्वान गर्नुपर्ने वैधानिक दायित्व रहेको उनीहरूको दाबी छ । तर, केन्द्रीय कार्यसमितिले उक्त मागलाई औपचारिक एजेन्डा समेत नबनाएको भन्दै प्रतिनिधिहरूले असन्तुष्टि जनाएका छन् ।

केन्द्रीय समितिको लामो बैठकपछि सार्वजनिक गरिएको १५औँ महाधिवेशनको कार्यतालिका प्रारम्भदेखि नै अविश्वसनीय देखिए पनि शंकाको सुविधासहित त्यसलाई स्वीकार गरिएको प्रतिनिधिहरूको भनाइ छ । तर, वडा अधिवेशनसमेत समयमा हुन नसक्नु र महाधिवेशनका कार्यक्रमहरू स्थगित भइसकेपछि घोषित मितिमा १५औँ महाधिवेशन नहुने कुरा स्पष्ट भएको उनीहरूले बताएका छन् ।

विशेष महाधिवेशन मागकर्ताहरूले पार्टी नेतृत्वमाथि ढिलासुस्ती, अस्पष्ट नीति र जालझेलको आरोप लगाउँदै विधानको बाध्यकारी व्यवस्था पालना गर्न आग्रह गरेका छन् ।