विशेष महाधिवेशन पक्षधरबाट कांग्रेसको निर्णयको इन्कार, भन्यो ; विशेष महाधिवेशन हुन्छ

काठमाडौं। नेपाली कांग्रेसका महामन्त्रीद्वय गगन थापा र विश्वप्रकाश शर्माले विशेष महाधिवेशन आह्वान गरेका छन्। ५४.५८ प्रतिशतले हस्ताक्षर बुझाएरै विशेष महाधिवेशन माग गरेको भन्दै दुवै महामन्त्रीले यही पुस २७ र २८ को लागि विशेष महाधिवेशनको माग गर्नुभएको छ। संयुक्त विज्ञप्ति निकाल्दै उनीहरूले यसमा सहभागी हुन अपिल गर्नुुभएको छ।

‘विधानबमोजिम निवेदन दिइसकेपछि विशेष महाधिवेशन बोलाउन नसक्ने अवस्थाको परिकल्पना नेपाली कांग्रेसको विधानले गरेको छैन। विधानबमोजिम कारणसहित माग गरेको विशेष महाधिवेशनलाई असान्दर्भिक वा औचित्यहीन भन्ने अधिकार विधानले कसैलाई प्रदान गरेको छैन । यस्तो अवस्थामा विधानसम्मत माग बेवारिसे हुन सक्दैन, महाधिवेशन आफैँ क्रियाशील हुन्छ र तोकिएको समयसिमाभित्र विशेष महाधिवेशन हुन्छ भन्ने कुरा हामीले पार्टी बैठकमा पटक पटक राखेका हौँ,’ विज्ञप्तिमा भनिएको छ ।

‘बहुमत महाधिवेशन प्रतिनिधिहरूद्वारा गरिएको विशेष महाधिवेशनको मागप्रति हाम्रो ऐक्यबद्धता रहेको छ । पुस २८ भित्र विशेष महाधिवेशन गर्नको लागि हस्ताक्षरकर्ता महाधिवेशन प्रतिनिधिको तर्फबाट भएको प्रयास महाधिवेशन प्रतिनिधिको वैधानिक अधिकार हो । पुस २७ र २८ का लागि तय भएको विशेष महाधिवेशन कानुनी र राजनितिक रूपमा समेत अपरिहार्य र बाध्यकारी बनेको छ’, विज्ञप्तिमा उल्लेख छ ।

केन्द्रीय समितबाट घोषणा गर्न माग गरे पनि नभएपछि आफूहरूले बाध्य भएर विशेष महाधिवेशन बोलाउनुपरेको उनीहरूको भनाइ छ ।

‘यस परिस्थितिमा विधानको धारा १७ उपधारा (२) बमोजिम विशेष महाधिवेशन आह्वान गर्न २४८८ जना(५४.५८ प्रतिशत) महाधिवेशन प्रतिनिधिहरूले ‘बदलिँदो राजनीतिक परिस्थितिमा नेपाली कांग्रेसलाई सुदृढ बनाउन, जनभावना अनुरूपको नीति निर्माण गर्न र नयाँ ऊर्जासहितको नेतृत्वमार्फत पार्टीको समग्र पुनर्निर्माणका लागि विशेष निर्णय लिनु अपरिहार्य रहेको’ भनि विशेष कारणसहित निवेदन दर्ता गरेको अवस्थामा त्यसको तीन महिनाभित्र विशेष महाधिवेशन सम्पन्न गर्नु केन्द्रको कार्यसम्पादन र जिम्मेवारीको विषय थियो र हो,’ विज्ञप्तिमा भनिएको छ, ‘तसर्थः केन्द्रीय कार्यसमितिले नै विशेष महाधिवेशन बोलाउनु उपयुक्त हुन्छ भनेर हामीले अधिकतम प्रयास गर्‍याैँ, तर केन्द्रीय कार्यसमितिबाट यो सम्भव हुन सकेन।’