पुरानै ठाउँमा फर्कियो राष्ट्रिय सभा

काठमाडौं । माघ ४ गतेका लागि बोलाइएको राष्ट्रिय सभाका लागि सिंहदरबार भित्रै बैठक कक्ष तयार गरिएको छ।

संघीय संसद् सचिवालयको यसअघि कृषि तथा प्राकृतिक स्रोत समितिको हललाई राष्ट्रिय सभाको बैठक कक्षका रुपमा तयार पारिएको छ। सो बैठक कक्ष २०६० सालमा संसद भंग हुनुअगाडि राष्ट्रिय सभाको बैठक सोही हलमा सञ्जालन हुने गरेको थियो।

त्यसपछि २०७४ सालमा राष्ट्रिय सभा गठन भएपछि नयाँ बानेश्वरस्थित अन्तर्राष्ट्रिय सम्मेलन केन्द्रमा बैठक बैस्दै आएको थियो।

जेनजी आन्दोलनका क्रममा भाद्र २४ गते बानेश्वरमा रहेको संसद भवन जलाइएको थियो। त्यसपछि वैकल्पिक रुपमा सिंहदरबारमै राष्ट्रिय सभाको बैठक राख्ने गरी व्यवस्थापन गरिएको हो।

राष्ट्रिय सभाको अधिवेशन माघ ४ गतेका लागि आह्वानका भइसकेको छ। जेनजी आन्दोलनपछि राष्ट्रिय सभाको बैठक बस्न लागेको हो।

संसद् सचिवालयका अनुसार राष्ट्रिय सभाको अधिवेशनका लागि केही विधेयक र सरकारले ल्याएका अध्यादेशहरू टेबल गर्नेछ ।

त्यसैगरी संसदीय समितिका अध्ययन प्रतिवेदन र वार्षिक प्रतिवेदनहरू पेस गरिने संसद सचिवालयले जनाएको छ। अधिवेशन सुरु भएपछि सांसदहरूले संकल्प प्रस्ताव, ध्यानाकर्षण प्रस्ताव र जरुरी सार्वजनिक महत्वको प्रस्ताव ल्याउन सक्छन् ।

राष्ट्रिय सभामा बैठकका लागि हल लगायत सम्पूर्ण तयारी पुरा भएको सचिवालयले जनाएको छ।