पश्चिमी रुसमा प्रहरी प्रशिक्षण केन्द्रमा विस्फोट, २० प्रशिक्षार्थी घाइते

पश्चिमी रुसको कोमी गणतन्त्रस्थित एक प्रहरी प्रशिक्षण केन्द्रमा प्रशिक्षकको लापरवाहीका कारण भएको विस्फोटमा परी २० जना घाइते भएका छन् ।

क्षेत्रीय आन्तरिक मामिला मन्त्रालयले सार्वजनिक गरेको प्रारम्भिक विवरण अनुसार सिक्तिभकार शहरमा रहेको उक्त प्रशिक्षण केन्द्रमा एक स्टन ग्रेनेड विस्फोट हुँदा आगलागी भएको थियो ।

दुर्घटनामा घाइते भएका प्रशिक्षार्थीहरूको शरीरका विभिन्न भाग र श्वासप्रश्वास नलीमा जलन हुनुका साथै कार्बन मोनोअक्साइड विषाक्तता देखिएको छ । घाइते सबैको स्थानीय अस्पतालमा उपचार भइरहेको र उनीहरूको अवस्था स्थिर रहेको बताइएको छ । मन्त्रालयले यस घटनालाई प्रशिक्षकको गम्भीर लापरवाही ठहर गर्दै उनी विरुद्ध फौजदारी मुद्दा दर्ता गरी विस्तृत अनुसन्धान शुरु गरेको छ ।