डडेलधुराबाट टिकट नपाएपछि देउवाद्वारा चुनाव नउठ्ने घोषणा

काठमाडौं। नेपाली कांग्रेसका पूर्वसभापति तथा पूर्वप्रधानमन्त्री शेरबहादुर देउवाले आगामी प्रतिनिधिसभा निर्वाचन नलड्ने हुनुभएको छ।

देउवाका प्रमुख स्वकीय सचिव भानु देउवाले उक्त जानकारी दिनुभएको हो।

‘शेरबहादुर देउवाज्यू आगामी प्रतिनिधिसभा निर्वाचनमा उम्मेदवार नहुने जानकारी गराउँछु,’ उहाँले भन्नुभयो।

पूर्वसभापति देउवाले डडेल्धुराबाट चुनाव लड्न टिकट मागिरहनु भए पनि , तर कांग्रेसले दिन मानिरहेको थिएन।

विशेष महाधिवेशनबाट निर्वाचित कार्यसमितिले देउवालाई संरक्षक रहँदै अभिभावकीय भूमिका निर्वाह गर्न भनेको थियो।

‘निवर्तमान सभापतिज्यूले आज बेलुकीसम्म पनि अन्तिम पटक डडेल्धुराबाट चुनाव लड्न चाहन्छु भन्ने खबर पठाइरहनुभएको थियो। उहाँलाई हामीले अभिभावकीय भूमिकामा रहन भनेका थियौं,’ कांग्रेसका एक पदाधिकारीले भने, ‘निवर्तमान सभापति देउवालाई उम्मेदवार बनाउँदा पार्टीभित्र आएको रूपान्तरण र पुस्तान्तरणको सन्देश नै खलबलिन्थ्यो। त्यसैले हामीले उहाँलाई उम्मेदवार बनाएनौं।’