निर्वाचनका लागि उत्साहजनक रूपमा मनोनयन दर्ता भएको प्रधानमन्त्रीको दाबी

काठमाडौं। प्रधानमन्त्री सुशीला कार्कीले आगामी फागुन २१ गते हुने प्रतिनिधि सभा निर्वाचनका लागि उत्साहजनक रूपमा मनोनयन दर्ता भएकोमा खुसी व्यक्त गर्दै मुलुकबाट अब अन्योल र अनिश्चितताको अवस्था पूर्ण रूपमा अन्त्य भएको बताउनुभएको छ।

मंगलबार उम्मेदवारी मनोनयन प्रक्रिया सम्पन्न भएपछि विशेष सन्देश जारी गर्दै प्रधानमन्त्री कार्कीले यसलाई लोकतन्त्रको अर्को महत्वपूर्ण कोशेढुङ्गा भएको उल्लेख गर्नुभएको छ। निर्धारित समयभित्र मनोनयन दर्ता गराउने सबै राजनीतिक दल र उम्मेदवारप्रति उनले आभार व्यक्त गर्नुभएको छ।

प्रतिनिधि सभाका १६५ पदका लागि ३ हजार ४ सयभन्दा बढी उम्मेदवारले मनोनयन दर्ता गराएको तथ्यले लोकतान्त्रिक प्रणालीप्रति नेपाली जनताको गहिरो विश्वास पुष्टि भएको प्रधानमन्त्रीको भनाइ छ। यो राष्ट्रिय उत्साहले लोकतन्त्रलाई सुदृढ बनाउन नेपाली जनता सचेत र सक्षम रहेको प्रमाणित गरेको उनले उल्लेख गर्नुभएको छ।

निर्वाचनको सुरक्षा व्यवस्थाबारे स्पष्ट पार्दै प्रधानमन्त्री कार्कीले सरकारले सुरक्षामा कुनै पनि प्रकारको सम्झौता नगर्ने बताउनुभएको छ। निर्वाचन शान्तिपूर्ण, निष्पक्ष र विश्वसनीय वातावरणमा सम्पन्न गर्न सरकार पूर्ण इमानदारीका साथ लागेको र सबै सुरक्षा संयन्त्र उच्च सतर्कता तथा व्यावसायिक मनोबलका साथ परिचालित रहेको जानकारी दिनुभएको छ।