अस्ट्रेलियाको बेरोजगारी दर ४.१ प्रतिशतमा झर्‍यो

सार्वजनिक गरिएको आधिकारिक तथ्याङ्कअनुसार डिसेम्बर महिनामा अस्ट्रेलियाको बेरोजगारी दर घटेर ४.१ प्रतिशत कायम भएको छ ।

यसै अवधिमा अस्ट्रेलियालीहरूले काम गरेको कुल समय पहिलो पटक २ अर्ब घण्टा पुगेर नयाँ कीर्तिमान कायम गरेको छ ।

अस्ट्रेलियन ब्युरो अफ स्ट्याटिस्टिक्सकाअनुसार नोभेम्बरमा ४।३ प्रतिशत रहेको बेरोजगारी दर डिसेम्बरमा ४।१ प्रतिशतमा झरेको हो। यो सन् २०२५ मा रेकर्ड गरिएको सबैभन्दा न्युन स्तर हो ।
तथ्याङ्कअनुसार नोभेम्बर र डिसेम्बरको बीचमा रोजगारीमा रहेका अस्ट्रेलियालीहरूको कुल संख्या ६५ हजार २ सयले बढेको छ । सोही अवधिमा आधिकारिक रूपमा बेरोजगारको सूचीमा रहेका व्यक्तिहरूको संख्या भने २९ हजार ८ सयले घटेको छ ।

नोभेम्बर र डिसेम्बरको बीचमा अस्ट्रेलियालीहरूले काम गरेको कुल घण्टामा ०।४ प्रतिशतले वृद्धि भई २ अर्ब पुगेको छ । जुन अहिलेसम्मकै उच्च हो ।