जसले संसद चलाए, उनलाई नै बनायो रास्वपाले उम्मेदवार

काठमाडौँ। रष्ट्रिय स्वतन्त्र पार्टी (रास्वपा)ले गत भदौ २४ गते काठमाडौंमा भएको ‘जेनजी’ आन्दोलनका क्रममा संसद् भवनभित्रै छिरेर तोडफोड र आगजनीमा संलग्न रहेका व्यक्तिलाई आगामी निर्वाचनको उम्मेदवार बनाएको खुलेको छ।

आगामी फागुन २१ गते हुने प्रतिनिधिसभाको निर्वाचनका लागि रास्वपाले मोरङ क्षेत्र नम्बर २ बाट कृष्णकुमार कार्कीलाई उम्मेदवार बनाएको छ । कार्की भदौ २४ गते नयाँ बानेश्वरस्थित संसद् भवन परिसरमा छिरेर विध्वंश मच्चाउने टोलीका मुख्यमध्येका एक रहेको पुष्टि भएको छ ।

मोरङको रतुवामाई नगरपालिका–९ निवासी कार्की १२ वर्ष वैदेशिक रोजगारीमा बसेका व्यक्ति हु्न । उनी जापानबाट केही समयअघि मात्र नेपाल फर्किएका देखिन्छ । उनी आफैंले सामाजिक सञ्जालमा राखेका तस्वीर र पोस्टमा संसद् भवनभित्र कुर्सी थुपारेर आगो लगाएको देख्न सकिन्छ ।

कार्कीले भदौ २५ गते फेसबुकमा लेख्दै आफूले संसद् भवनको कुर्सी जलाएको र नेताहरूको घरमा समेत पुगेर आगजनी गरेको स्वीकार गरेका छन् ।

उनले लेखेका छन्, हामी संसद् भवन प्रवेश गरिम, संसद् भवनको भित्र अगाडि हामीले पुरानो कुर्सी जम्मा गरेर आगो बालिम र खुसियाली मनाइम।।। नेताको घरमा मात्र हाम्रो टारगेट थियो ।’