देश ‘ब्ल्याक लिस्ट’तर्फ धकेलिनसक्ने खतरा छः सांसद भट्टराई

काठमाडौँ। नेकपा एमालेका सांसद गोपाल भट्टराईले सरकारले राष्ट्रिय स्वतन्त्र पार्टीका सभापति एवं पूर्वगृहमन्त्री रवि लामिछानेको संगठित अपराध र सम्पती शुद्धीकरणसम्बन्धी मुद्दा फिर्ता लिन गरेको निर्णयप्रति आपत्ति जनाउनुभएको छ ।

मंगलवार बसेको राष्ट्रिय सभाको विशेष समयमा बोल्दै उहाँले हाल नेपाल ‘ग्रे लिस्ट’मा रहेको अवस्थामा यस्ता संवेदनशील मुद्दा कमजोर पार्ने कार्यले देशलाई ‘ब्ल्याक लिस्ट’तर्फ लैजाने खतरा बढेको बताउनुभयो । संगठित अपराध र सम्पत्ति शुद्धीकरणजस्ता गम्भीर मुद्दामा राज्य संयन्त्र नै लागेर अपराधलाई प्रोत्साहन गर्ने हो भने अब देश ब्ल्याक लिस्टमा जानबाट कसले रोक्नसक्छ रु उहाँको प्रश्न छ ।

नेपालले सम्पती शुद्धीकरण नियन्त्रणसम्बन्धी कानुन निर्माण र कार्यान्वयनका लागि विभिन्न अन्तर्राष्ट्रिय सम्झौतामा हस्ताक्षर गरेको उहाँले उल्लेख गर्नुभयो । तर सम्पती शुद्धीकरण र संगठित मुद्दालाई कमजोर बनाउने निर्णयले नेपाल अझै गहिरो संकटतर्फ धकेलिनसक्ने संकेत देखिएको उहाँको भनाई छ । यसले विदेशी शक्तिहरूको चलखेल बढ्ने र देशलाई खाल्टोतिर लैजाने सम्भावना रहेको उहाँले बताउनु भयो । यस्ता कार्यलाई रोक्न संसद्मा व्यापक बहस आवश्यक रहेको उहाँले बताउनुभयो ।

उहाँले भन्नुभयो, ‘अहिले देश ग्रे लिष्टमा छ । संगठित अपराध, सम्पत्ति शुद्धिकरण जस्ता मुद्दालाई कमजोर बनाउन राज्य संयन्त्र नै लागेर अपराधहरुलाई प्रोत्साहन गर्ने हो भने अब व्ल्याक लिष्टमा जान कसैले रोक्नसक्छ रु अब त देश व्ल्याक लिष्टतिर जाने खतरा बढ्यो ।

कानून निर्माण गरेर सम्पत्ति सुद्धिकरण गर भन्ने अन्तराष्ट्रिय समुदायको आग्रहमा हामीले हस्ताक्षर गरेका छौँ । यसले के देखाउँछ भने अझै देशलाई खाल्टोतिर लैजाने, विदेशी शक्तिहरुले चलखेल गर्ने सम्भावना बढ्दै गएको छ । यस्ता क्रियाकलाप रोक्न संसदमा व्यापक बहस गर्न जरुरी छ । यो सरकार निर्वाचन गराउन र सुशासन कायम गर्ने म्याण्डेल लिएर बनेको थियो । सुशासनको नाममा राजनितिक नेताहरुको उछितो काट्ने काम भयो ।’

महान्यायाधिवक्ताको कार्यालयले विभिन्न सहकारी ठगी प्रकरणमा संलग्न रहेको आरोप लागेका रास्वपा सभापति लामिछानेमाथि लगाइएका ‘संगठित अपराध’ र ‘सम्पती शुद्धीकरण’ सम्बन्धी मुद्दा परिमार्जन गरी फिर्ता लिने निर्णय गरेको थियो । उक्त निर्णय विरुद्ध सर्वोच्च अदालतमा रिट पनि परेको छ । – न्युज एजेन्सी नेपाल