सिरियाली सुरक्षा बल हसाका शहरमा प्रवेश

सिरियाली आन्तरिक सुरक्षा बल सोमवार हसाका शहरमा प्रवेश गरेको छ । सिरियाली अन्तरिम सरकार र कुर्दिस नेतृत्वको सिरियन डेमोक्रेटिक फोर्सेस ९एसडीएफ० बीच हालै भएको सम्झौताको एक हिस्साको रूपमा यो कदम चालिएको हो ।

जसलाई उत्तर–पूर्वी सिरियामा तनाव कम गर्न र प्रमुख शहरी केन्द्रहरूमा राज्यको अधिकार पुनःस्थापना गर्ने दिशामा एक महत्वपूर्ण पाइला मानिएको छ । राज्य सञ्चालित टेलिभिजन अल–इखबारियाले रिपोर्ट गरेअनुसार गत हप्ता हस्ताक्षर गरिएको सम्झौताको कार्यान्वयनका क्रममा यो परिचालन गरिएको हो ।

जसमा व्यापक युद्धविराम र सैन्य तथा प्रशासनिक संरचनाहरूको चरणबद्ध समायोजनको प्रावधान रहेको छ । युद्धविराम सम्झौतामा सम्पर्क रेखाहरूबाट सुरक्षा बलहरू फिर्ता गर्ने र सुरक्षा एकीकरण सुरु गर्न हसाका र कामिश्लीका केन्द्रहरूमा अन्तरिम सरकारको सुरक्षा इकाइहरू तैनाथ गर्ने उल्लेख छ । टर्की र इराकको सीमासँग जोडिएको हसाका प्रान्त आफ्नो कृषि स्रोत, तेल क्षेत्र र जातीय विविधताका कारण लामो समयदेखि सिरियाको सबैभन्दा रणनीतिक र संवेदनशील क्षेत्रहरूमध्ये एक रहेको छ ।

सन् २०१२ देखि यस क्षेत्रको नियन्त्रण विभाजित रहँदै आएको थियो, जहाँ इस्लामिक स्टेट समूहको पराजयपछि एसडीएफले प्रान्तको ठूलो हिस्सामा वास्तविक अधिकार प्रयोग गर्दै आएको थियो भने सिरियाली सरकारले प्रमुख शहरहरूमा सीमित सुरक्षा उपस्थिति मात्र कायम राखेको थियो।

यो पछिल्लो सम्झौता उत्तरी सिरियामा हप्तौंसम्म चलेको छिटपुट झडप र कमजोर युद्धविरामपछि भएको हो । जसको समयमा दमास्कसले रक्का, डेर अल–जोर र हसाकाका केही भागहरूमा आफ्नो सुरक्षा उपस्थिति विस्तार गरेको थियो ।