इजिप्ट–चीन औषधि विज्ञान सम्मेलनमा परम्परागत चिकित्सामा कृत्रिम बुद्धिमत्ताको समायोजनबारे छलफल

संयुक्त अन्तर्राष्ट्रिय औषधि विज्ञान सम्मेलन २०२६ सोमबार कायरोमा दुई दिने छलफलपछि सम्पन्न भएको छ। यस सम्मेलनमा कृत्रिम बुद्धिमत्ताको प्रयोगमा केन्द्रित हुँदै पश्चिमी औषधि र परम्परागत चिनियाँ चिकित्साको संयोजनका बारेमा छलफल गरिएको थियो।

इजिप्टियन चाइनिज युनिभर्सिटी र चिनियाँ चिकित्सा अनुसन्धान तथा प्रवद्र्धनका लागि चिनियाँ संघद्वारा आयोजित यस सम्मेलनले लामो समयदेखि स्थापित चिकित्सा अभ्यासहरूमा डिजिटल प्रविधिहरू कसरी लागू गर्न सकिन्छ भन्ने विषयमा अनुसन्धान गरेको थियो। अन्तिम सत्रहरूले तथ्याङ्कमा आधारित औषधि विकास र थप व्यक्तिगत बिरामीको हेरचाहमा कृत्रिम बुद्धिमत्ताको भूमिकालाई जोड दिएका थिए ।

इजिप्टियन चाइनिज युनिभर्सिटीको औषधि विज्ञान र औषधि प्रविधि संकायका डीन तथा सम्मेलनका अध्यक्ष मिना टाड्रोसले यस कार्यक्रमको उद्देश्य पश्चिमी चिकित्सा र परम्परागत चिनियाँ दृष्टिकोणहरू बीचको एकीकरणलाई बढावा दिनु रहेको बताउनु भयो ।

उहाँकाअनुसार यससँगै आयोजित प्रदर्शनीमा इजिप्टका १२ वटा औषधि तथा चिकित्सा उपकरण कम्पनीहरू र चारवटा प्रमुख चिनियाँ कम्पनीहरूको सहभागिता रहेको थियो। चिनियाँ संघको बाह्य चिकित्सा समितिका वरिष्ठ विशेषज्ञ झु चाओपिङले परम्परागत चिनियाँ चिकित्साको विश्वव्यापी पहुँच विस्तार गर्न इजिप्टले महत्वपूर्ण भुमिका खेल्न सक्ने बताउनु भयो ।

उहाँले बेल्ट एण्ड रोड इनिसिएटिभ अन्तर्गतको सहयोगसहित इजिप्टको भौगोलिक अवस्थिति र चीन तथा अफ्रिकासँगको यसको सम्बन्धलाई उल्लेख गर्नुभयो । अन्तिम दिनको कार्यक्रममा सहभागीहरूले आनुवंशिकी, खोप विकास र औषधि उत्पादनको डिजिटल रूपान्तरणमा भएका प्रगतिहरूका बारेमा छलफल गर्नुभयो ।

आयोजकहरूकाअनुसार यस वैचारिक आदानप्रदानले इजिप्ट र चीनका संस्थाहरूबीच नयाँ अनुसन्धान साझेदारीहरू स्थापना गर्न र इजिप्टको सार्वजनिक स्वास्थ्य प्राथमिकताहरूलाई सहयोग पुरÞ्याउने अपेक्षा गरिएको छ ।