अमेरिकी प्रतिनिधि सभाद्वारा बजेट प्याकेज पारित, सरकारी कामकाजमाथिको अवरोध अन्त्य

अमेरिकी प्रतिनिधि सभाले मङ्गलवार सिनेटबाट स्वीकृत कोष प्याकेज पारित गरेको छ । जसले शनिवारदेखि शुरु भएको आंशिक सरकारी बन्द र सङ्घीय कोषमा आएको छोटो रिक्ततालाई अन्त्य गरेको छ ।

तल्लो सदनले २१७–२१४ मतले उक्त उपायलाई अनुमोदन गरेको हो । धेरै विभागहरूको लागि सरकारी कोष समाप्त हुनु केही घण्टा अघि शुक्रवार साँझ अमेरिकी सिनेटले कोष प्याकेज स्वीकृत गरेपछि प्रतिनिधि सभाबाट यो पारित भएको हो ।

यो विधेयक अब अमेरिकी राष्ट्रपति डोनल्ड ट्रम्पकहाँ जानेछ । जसले यसलाई तुरुन्तै हस्ताक्षर गर्ने बताउनुभएको छ । पछिल्लो प्याकेजले सेप्टेम्बर ३० मा समाप्त हुने बाँकी आर्थिक वर्षको लागि धेरै अमेरिकी सङ्घीय एजेन्सीहरूलाई आर्थिक सहयोग गर्नेछ ।

ती निकायहरूमा रक्षा मन्त्रालय, शिक्षा मन्त्रालय, स्वास्थ्य र मानव सेवा मन्त्रालय, श्रम मन्त्रालय, यातायात मन्त्रालय, र आवास तथा सहरी विकास मन्त्रालय समावेश छन् । शुरुमा सर्वपक्षीय कोष प्याकेजमा समावेश गरिएको गृह सुरक्षा मन्त्रालयको कोष हटाइएको छ ।

यसको सट्टा उक्त विभागले हालको कोष स्तरमा दुई हप्ताको निरन्तर प्रस्ताव प्राप्त गर्नेछ । जसले दुवै पक्ष र ह्वाइट हाउसलाई अध्यागमन कार्यान्वयनमा वार्ता जारी राख्न अनुमति दिनेछ ।

मिनियापोलिस राज्यमा सङ्घीय प्रवर्तन कर्मचारीहरूद्वारा भएका हालैका दुईवटा घातक गोलीकाण्डले डेमोक्र्याटहरूलाई अध्यागमन निकायहरूले कसरी काम गर्छन् भन्ने कुरामा परिवर्तन खोज्न प्रेरित गरेको छ ।