टर्कीको जनवरीमा मासिक मुद्रास्फीतिमा वृद्धि

टर्कीको आधिकारिक तथ्याङ्कअनुसार जनवरी महिनामा मासिक मुद्रास्फीतिमा तिब्रता आएको छ भने वार्षिक मुद्रास्फीति अझै ३० प्रतिशतभन्दा माथि रहेको छ ।

टर्की तथ्याङ्क संस्थानले मंगलवार सार्वजनिक गरेको तथ्याङ्कअनुसार उपभोक्ता मूल्य अघिल्लो महिनाको तुलनामा ४।८४ प्रतिशतले बढेको छ, जुन अपेक्षा अनुसार नै रहेको छ । वार्षिक आधारमा भने डिसेम्बरको ३०।८९ प्रतिशतबाट सामान्य घटेर जनवरीमा मुद्रास्फीति ३०।६५ प्रतिशत कायम भएको छ । तथ्याङ्कका अनुसार मुख्य तीन खर्च समूहहरूमा मूल्य वृद्धि जारी रहेको छ ।

वार्षिक आधारमा खाद्य र गैर–अल्कोहल पेय पदार्थमा ३१।६९ प्रतिशत, यातायातमा २९।३९ प्रतिशत र आवास, पानी, बिजुली, ग्यास तथा अन्य इन्धन समूहमा ४५।३६ प्रतिशतको वृद्धि देखिएको छ । टर्कीका अर्थमन्त्री मेहमेत सिम्सेकले सामाजिक सञ्जाल एक्समार्फत खराब मौसमका कारण खाद्य सामग्रीको मूल्यमा भएको तीव्र वृद्धिले जनवरीको मुद्रास्फीति बढाएको उल्लेख गरेका छन् ।

यद्यपि उनले सेवा क्षेत्रको मुद्रास्फीतिमा निरन्तर गिरावट आएको र मुख्य वस्तुहरूको मुद्रास्फीति १७।४ प्रतिशतमा सीमित रहेको बताएका छन् । टर्की विगत केही वर्षदेखि उच्च मुद्रास्फीतिसँग जुधिरहेको छ । जसले घरपरिवारको क्रयशक्ति र व्यवसायिक लागतमा भारी असर पारेको छ ।