दक्षिण कोरियाको सिहेउङस्थित एक कारखानाको आगलागीमा ३ जना घाइते

दक्षिण कोरियाको ग्योन्गी प्रान्तको सिहेउङस्थित एउटा एसपीसी सामलिप खाद्य प्रशोधन कारखानामा मंगलवार दिउँसो आगलागी हुँदा तीन जना कामदार घाइते भएको योनहाप समाचार एजेन्सीले जनाएको छ। मंगलवार दिउँसो करिव २ः२९ बजे रोटी उत्पादन लाइनमा आगो सल्किएको थियो । जतिबेला त्यहाँ १२ जना कामदारहरू ड्युटीमा थिए ।

दमकल अधिकारीहरूले दिउँसो ३ः०६ बजे स्तर १ को आपतकालीन प्रतिक्रिया जारी गरी घटनास्थलमा करिव ३० वटा सवारी साधन र ७० जना अग्निनियन्त्रकहरू परिचालन गरेका थिए। कम्पनीको आधिकारिक वेबसाइटकाअनुसार उक्त कारखानाले मुख्यतया बेकरी र जमेका खाना लगायतका खाद्य पदार्थहरू प्रशोधन गर्ने गर्दछ ।

प्रहरी र दमकल अधिकारीहरूले आगो नियन्त्रणमा लिने प्रयास गर्दै सम्भावित पीडितहरूको खोजी गरिरहेका छन् । आगलागीको वास्तविक कारणबारे स्थिति सामान्य भएपछि अनुसन्धान शुरु गरिनेछ ।