महिला प्रिमियर लिगको उपाधि आरसीबीलाई

काठमाडौं। रोयल च्यालेन्जर्स बेङ्लुरु (आरसीबी)ले दोस्रोपटक महिला प्रिमियर लिग टी– २० क्रिकेट प्रतियोगिताको उपाधि जितेको छ । आरसीबीले बिहीबार सम्पन्न फाइनलमा दिल्ली क्यापिटल्सलाई ६ विकेटले निरास बनायो ।

बडोदरास्थित कोटाम्बी रंगशालामा दिल्लीले प्रस्तुत गरेको २०४ रनको लक्ष्य आरसीबीले २ बल बाँकी रहँदा ४ विकेट गुमाउँदै पूरा गर्यो ।

आरसीबीका लागि कप्तान स्मृति मन्धनाले ४१ बलमा १२ चौका र ३ छक्काको मद्दतले सर्वाधिक ८७ रनको योगदान गरिन् । यसैगरी, जर्जिया भोलले ५४ बलमा १४ चौकासहित ७९ र राधा यादवले अविजित १२ रन बनाए ।

दिल्लीका लागि चिनेल हेनरीले २ तथा मिन्नु मणी र नन्दनी शर्माले १–१ विकेट लिए ।

त्यसअघि टस हारेर ब्याटिङको निम्तो पाएको दिल्लीले निर्धारित २० ओभरमा ४ विकेट गुमाउँदै २०३ रनको योगफल तयार पारेको थियो ।

दिल्लीका लागि कप्तान जेमिमाह रोड्रिग्वेजले ३७ बलमा ८ चौकाको मद्दतले सर्वाधिक ५७ रनको योगदान गरिन् । यसैगरी, लोर उल्भार्ड्टले ४४, लिजेल लीले ३७, चिनेल हेनरीले अविजित ३५ र शफाली वर्माले २० रन बनाए ।

आरसीबीका लागि सायली सतघरे, अरुणधती रेड्डी र नादिन डे क्लार्कले १–१ विकेट लिए ।

यसअघि आरसीबी सन् २०२४ मा उपाधि जितेको थियो । दिल्ली भने लगातार चौथो संस्करण फाइनलमा पराजित भएको हो ।