पुटिनको हतियार तैनाथीसम्बन्धी प्रस्ताव ट्रम्पद्वारा अस्वीकार

काठमाडौं। अमेरिकी राष्ट्रपति डोनाल्ड ट्रम्पले रणनीतिक आणविक हतियार तैनाथीसम्बन्धी सीमा विस्तार गर्न रुसी राष्ट्रपति भ्लादिमिर पुटिनले राखेको प्रस्ताव अस्वीकार गरेका छन् । ट्रम्पले पुरानो ‘न्यु स्टार्ट’ सन्धि कमजोर र गलत रूपमा गरिएको भन्दै नयाँ र आधुनिक सम्झौता आवश्यक रहेको बताएको अल जजिराले जनाएको छ ।

ट्रम्पले अमेरिका र रुसका आणविक विज्ञहरूबीच नयाँ सम्झौताका लागि वार्ता हुनुपर्ने उल्लेख गरेका छन् । न्यु स्टार्ट सन्धिको म्याद सकिएपछि दुवै देशका विशाल आणविक भण्डारणमा कानुनी सीमा नरहेकाले सम्भावित हतियार प्रतिस्पर्धाको चिन्ता बढेको छ ।

रुसले सन्धि सकिनुमा खेद व्यक्त गर्दै राष्ट्रिय हितलाई ध्यानमा राखेर जिम्मेवार नीति अपनाउने जनाएको छ । यसबीच युक्रेन युद्धबारे छलफलका क्रममा अमेरिका र रुसबीच न्यु स्टार्ट अस्थायी रूपमा विस्तार गर्ने अनौपचारिक छलफलसमेत भएको बताइएको छ ।

विश्लेषकहरूका अनुसार विश्वभर बढ्दो भू–राजनीतिक तनावका बीच आणविक नियन्त्रणसम्बन्धी सम्झौताहरू कमजोर हुँदै जानु चिन्ताको विषय बनेको छ ।