बर्दियामा चितुवाले आक्रमण गर्दा एकैदिन दुईजनाको मृत्यु

काठमाडौँ। बर्दियामा चितुवाको आक्रमणबाट एकै दिन दुईजनाको मृत्यु भएको छ। मधुवन नगरपालिका–९, गाउँ नं १३ निवासी ४९ वर्षीया मैसरा डाँगी र गुलरिया नगरपालिका–४, तुल्सीपुर निवासी ३५ वर्षीय नन्दु रोकायले ज्यान गुमाएका हुन्।

डाँगी नेपाल–भारत सीमा नजिक बारीमा छिमेकीहरूसँग घाँस काटिरहेका बेला चितुवाले आक्रमण गरी भारतको वनतर्फ लगेको थियो। पछि दशगजा नजिक अरहर बारीमा उनको शव फेला परेको जिल्ला प्रहरी कार्यालय बर्दियाका प्रहरी नायब उपरीक्षक देवेन्द्रकुमार मल्लले बताउनुभएको छ।

त्यसैगरी, मृतक रोकाय बबई नदी तरेर बारबर्दिया नगरपालिका- ११ स्थित जनजागृति सामुदायिक वनमा घाँस काट्न जाँदै गर्दा चितुवाको आक्रमणमा परेको डिभिजन वन कार्यालय बर्दियाका सूचना अधिकारी शिवबहादुर केसीले जानकारी दिनुभयो। रोकाय श्रीमतीसहित चार जना सामुदायिक वनमा पुगेका थिए। वनमा पुग्नेबित्तिकै चितुवाले आक्रमण गरेको स्थानीयले बताएका छन्। रोजगारीका लागि भारत गएका रोकाय १२ दिनअघि मात्र घर आएका थिए।

चितुवाको आक्रमणबाट माघ महिनामा मात्र तीनजनाको मृत्यु भइसकेको छ। यसअघि गत माघ ७ गते सोही स्थानमा तोरी उखेल्ने क्रममा चितुवाको आक्रमणबाट खिदनी थारूको मृत्यु भएको थियो।

पछिल्लो समय बर्दियामा चितुवा तथा अन्य वन्यजन्तुको आक्रमणका घटना बढेको छ। डिभिजन वन कार्यालयको तथ्याङ्कअनुसार साउनयता चितुवाको आक्रमणबाट सात जना, पाटेबाघको आक्रमणबाट एकजना र जंगली हात्तीको आक्रमणबाट दुईजनाको मृत्यु भएको छ।