चितुवाको आक्रमणले दुईको ज्यान गएपछि प्रशासन घेराउ

गुलरिया। एक दिनमा दुई जनाको चितुवाको आक्रमणबाट ज्यान गएपछि पीडित परिवारका सदस्य र स्थानीयले जिल्ला प्रशासन कार्यालय बर्दिया घेराउ गरेका छन् ।

पीडित परिवारसहित स्थानीयबासीहरूले प्रशासन कार्यालय घेराउ गर्दै तोडफोडमा उत्रिएपछि बर्दियामा सर्वदलीय सर्वपक्षीय बैठक बसेर चितुवालाई नियन्त्रणमा लिने र आवश्यक परे कानुनबमोजिम गर्ने निर्णय भएको छ ।

पीडितका आफन्त र स्थानीवासीहरूले मान्छे मार्ने चितुवा मार्नु पर्ने माग गर्दैआएका छन् । पीडित परिवारलाई राहत, क्षतिपूर्ती र रोजगारको व्यवस्था गर्नुपर्ने र चितुवा तत्काल नियन्त्रणमा लिइ मार्नुपर्ने माग गरेका थिए ।

डिभिजन वन कार्यालय र सम्बन्धित निकायले वेवास्ता गरेको हुनाले जिल्ला प्रशासन कार्यालय घेराउ गर्नुपरेको गुलरिया नगरपालिका –४ तुल्सीपुरकी जितकुमारी योगीले बताउनुभयो ।

स्थानीयबासीले जिल्ला प्रशासन कार्यालयको गेट खोलेर भित्रपसी प्रमुख जिल्ला अधिकारीको कार्यकक्ष, भण्डार कक्ष र लेखा शाखाको ढोकामा क्षति गरेका गरेका छन् । स्थानीयको बिरोधपछि जिल्ला प्रशासन कार्यालयमा पीडित परिवारसहित सर्वपक्षीय बैठक बसेको थियो ।

बैठकले चितुवा नियन्त्रणका लागि प्रचलित कानुन बमोजिम सबै उपायहरू अवलम्बन गरी डिभिजन वन कार्यालय बर्दिया, बर्दिया राष्ट्रिय निकुञ्ज कार्यालय र जिल्लास्थित सुरक्षा निकायहरूले कार्यआरम्भ गरी तत्काल नियन्त्रणमा लिने निर्णय भएको बर्दियाका निमित्त प्रमुख जिल्ला अधिकारी अशोककुमार भण्डारीले बताउनुभयो । स्थानीयबासीले चितुवा नियन्त्रणमा लिएर फेरि छाड्नेभन्दा पनि मार्नुपर्ने माग गरेका छन् । स्थानीयबासीलाई चितुवा मार्ने अनुमति दिनु पर्ने माग गर्दैआएका छन् ।

बर्दियामा बिहीबार चितुवाको आक्रमणबाट एकै दिनमा दुई जनाको मृत्यु भएको थियो । मृत्यु हुनेमा गुलरिया नगरपालिका वडा ४ तुल्सीपुर बस्ने ३५ वर्षीय नन्दु रोकाय र मधुवन नगरपालिका वडा ९ गाउँ नं १३ बस्ने ४९ वर्षिया मैसारा डाँगी रहेका छन् ।

बारबर्दिया नगरपालिकाको वडा ११ मा रहेको जनजागृति सामुदायिक वनमा घाँस काट्न जाँदै गर्दा मृतक रोकायलाई चितुवाले आक्रमण गरेको डिभिजन वन कार्यालय बर्दियाका सूचना अधिकारी शिवबहादुर केसीले बताउनुभयो ।

पैसा कमाउन भारत गएका रोकाय १२ दिन अघिमात्र घर आउनु भएको थियो । उहाँको एक श्रीमती सुस्मा रोकाय र ९ वर्षिय छोरा रीतिक रोकाय छन् । मृत डाँगी बारीमा छिमेकीहरूसँग घाँस काट्दै गर्दा चितुवाले आक्रमण गरी भारतीय वनतर्फ लगेको थियो ।

खोजविनको क्रममा दशगजानजिक अरहर बारीमा उहाँको शव फेला परेको जिल्ला प्रहरी कार्यालय बर्दिया प्रहरी नायव उपरीक्षक देवेन्द्रकुमार मल्लले बताउनुभयो । माघ महिनामा मात्र बारबर्दिया नगरपालिका वडा ११ बेलभारमा चितुवाको आक्रमणबाट दुई जनाको मृत्यु भएको छ । यसअघि गत माघ ७ गते सोही गाउँमा तोरी उखाल्ने क्रममा चितुवाको आक्रमणबाट बारबर्दिया नगरपालिका वडा ११ बेलभारकी खिदनी थारूको मृत्यु भएको थियो ।

चितुवाको आक्रमणबाट मात्र माघ महिनामा तीन जनाको मृत्यु भएको छ । डिभिजन वन कार्यालयको तथ्याङ्कअनुसार गत साउन यता सात जना चितुवाको आक्रमणबाट, एक जना पाटेबाघको आक्रमणबाट र दुई जना जंगली हात्तीको आक्रमणबाट मृत्यु भएको छ ।

श्रीमतीलाई रोजगारी

संविधान सभा सदस्य विना ज्ञावलीले मृतक नन्दु रोकायको छोरा ९ वर्षिय रीतिक रोकायको पढाउने र लालपालनको जिम्मा लिनुभएको छ । आर्थिक अवस्था नाजुक भएको हुनाले रीतिकको लालनपालन र पढाउने जिम्मा लिने उहाँले बताउनुभयो ।

त्यसैगरी श्रीमती सुस्मा रोकायलाई जिविकोपार्जनका लागि गुलरिया नगरपालिकाले रोजगारीको व्यवस्था गर्ने भएको छ । गुलरिया नगरपालिकाका नगरप्रमुख मुक्तिनाथ यादवले परिवारको जीविकोपार्जनमा सहज होस् भनेर मृतक नन्दु रोकायको श्रीमती सुस्मा रोकायलाई करारमा कर्मचारी राख्ने बताउनुभयो । रोजगारीको व्यवस्था भएपछि परिवारलाई जिविकोपार्जन गर्न सहज हुने बताइएको छ ।