ग्रिकका किसानद्वारा एथेन्समा ट्याक्टर र्‍यालीः उत्पादन लागत घटाउन र राहतको माग

बढ्दो उत्पादन लागत र आम्दानीमा भएको घाटाको विरोध गर्दै ग्रीसभरका किसानले राजधानी एथेन्समा ट्याक्टरसहित प्रदर्शन गरेका छन् । ग्रिकभरका किसान शुक्रवार राजधानी एथेन्समा राष्ट्रव्यापी आन्दोलनका लागि भेला भएका थिए ।

ग्रिकको राष्ट्रिय प्रसारक इआरटीकाअनुसार करिव ७० वटा ट्याक्टर र कृषि सवारी साधनहरू सिन्टाग्मा स्क्वायरमा पुगेर संसद भवन अगाडि पार्क गरिएका थिए । यो प्रदर्शनले ग्रिकको कृषि क्षेत्रमा व्याप्त असन्तुष्टिलाई उजागर गरेको छ । किसान प्रतिनिधिहरूले राजमार्ग अवरोधपछि अब आन्दोलनलाई शहरी केन्द्रहरूमा केन्द्रित गरिएको बताएका छन् । उनीहरूले कृषि उत्पादन लागत घटाउन, घटेको आम्दानीको क्षतिपूर्ति दिन र भेडामा लाग्ने ‘शिप पक्स’ रोगका कारण पशुपालनमा परेको असरलाई सम्बोधन गर्न लक्षित सहयोग नीति ल्याउन सरकारसँग माग गरेका छन् ।

यसैबीच ग्रिकको कृषि विकास तथा खाद्य मन्त्रालयले अनुदान भुक्तानीमा देखिएका समस्या समाधान गर्न एक सुधार प्लेटफर्म खोलिएको जनाएको छ । सरकारले डिजेलमा लाग्ने विशेष उपभोग कर फिर्ता गर्ने र बाली अनुसार इन्धन बाँडफाँडको पुनः गणना गर्ने विषयमा परामर्श गर्ने योजना पनि अघि सारेको छ । आन्दोलनका कारण एथेन्सको केन्द्रिय क्षेत्रमा ट्राफिक नियन्त्रणका उपायहरू लागू गरिएको थियो ।