उज्यालो नेपालको प्रतिबद्धता : ५० प्रतिशत कृषि क्षेत्रलाई जैविक कृषि क्षेत्र घोषणा

काठमाडौं। अन्तरिम सरकारका पूर्वमन्त्री कुलमान घिसिङ अध्यक्ष रहेको उज्यालो नेपाल पार्टीले अर्गानिक उत्पादनलाई प्राथमिकता दिनका लागि पाँच बर्षमा ५० प्रतिशत कृषि क्षेत्रलाई जैविक कृषि क्षेत्र घोषणा गर्ने प्रतिबद्धता जनाएको छ।

आसन्न प्रतिनिधिसभा निर्वाचनका लागि तयार गरेको प्रतिबद्धतापत्रमा उज्यालो नेपालले अर्गानिक कृषि क्रान्तिको वाचा गरेको हो। ‘५० प्रतिशत कृषि क्षेत्रलाई जैविक कृषि क्षेत्र घोषणा गरी उत्पादित वस्तु विक्रीका लागि बजारीकरणको व्यवस्था मिलाइनेछ’, प्रतिबद्धता पत्रमा भनिएको छ‚ ‘कृषि उत्पादनमा लागत मूल्यमा २० प्रतिशतले थप गरी खरिद गर्ने व्यवस्था मिलाइनेछ।’

किसानलाई प्रत्यक्ष अनुदान शीर्षकमा यो पार्टीले डिजिटल आईडीमार्फत सिंचाइ, मल, बीउ र बिमाका लागि दिइने अनुदान सीधै किसानको खातामा जाने व्यवस्था मिलाउने घोषणा गरेको छ ।

यसैगरी कृषि सहकारी स्टार्टअप फन्ड अन्तर्गत युवा किसान समूहलाई २५ लाखसम्मको सहुलियत ऋण ५ वर्षका लागि उपलब्ध गराउने वाचा गरिएको छ।

कृषि सिंचाइको लागि प्रयोग हुने विद्युत निःशुल्क दिने, व्यावसायिक कृषि गर्ने किसानको लागि माछा, कुखुरा तथा बाख्रा पालन, च्याउ उत्पादन, चिया खेती आदी कार्यका लागि सहुलियतपूर्ण विद्युत महशुलको व्यवस्था मिलाउने प्रतिबद्धता उज्यालो नेपालले गरेको छ।

जलवायु परिवर्तनका कारण कृषि, ऊर्जा लगायतका महत्वपूर्ण क्षेत्रहरु नराम्ररी प्रभावित भइरहेको अवस्थामा दलहरुका घोषणापत्रमा यो मुद्दा कसरी समेटिनेछन् भन्ने प्रश्नका वीच उज्यालो नेपालले जलवायु, अनुकूलन र विपद् बिमाका विषय उल्लेख गरेको छ।

‘जलवायु अनुकूलित हरित पूर्वाधारमार्फत विपद् पूर्व तयारीलाई योजनाबद्ध, प्रभावकारी र दिगो बनाइनेछ, उज्यालो नेपाल पार्टीको निर्वाचन प्रतिबद्धता पत्रमा भनिएको छ, सबै नागरिकका लागि विपद् बिमा सुनिश्चित गरिनेछ।’