आईएस–संवद्ध अष्ट्रेलियालीहरूको सिरियाबाट स्वदेश फिर्तीमा ढिलाइ

सिरियाको उत्तरपूर्वी क्षेत्रमा रहेका इस्लामिक स्टेटसँग आवद्ध ११ अष्ट्रेलियाली परिवारको स्वदेश फिर्ती प्रक्रिया समन्वयको कमीका कारण अन्तिम समयमा स्थगित भएको छ। सोमवार ११ अष्ट्रेलियाली परिवारका ३४ सदस्यहरूलाई उत्तरपूर्वी सिरियाको रोज क्याम्पबाट फिर्ता लैजाने योजना बनाइएको थियो । तर सिरियाली अन्तरिम प्रशासनले आवश्यक समन्वय नपुगेको भन्दै उक्त प्रक्रियालाई बीचैमा रोकिदिएको छ ।

क्याम्प अधिकारी शेखमोस अहमदकाअनुसार परिवारहरूलाई दमास्कस पुग्नु अगावै क्याम्पमै फर्काउन आदेश दिइएको थियो । अधिकारीहरूकाअनुसार दमास्कस प्रशासनसँग समन्वय गरेर नयाँ मिति तय गरिनेछ । रोज क्याम्पकी निर्देशक हाकिमा इब्राहिमले हाल यस क्याम्पमा ४० भन्दा बढी देशका ७४२ परिवारहरू बसोवास गरिरहेको जानकारी दिनुभयो ।

सन् २०२६ को यो पहिलो स्वदेश फिर्ती प्रयास थियो । सिरियाली मानवअधिकार पर्यवेक्षककाअनुसार यस्तो स्वदेश फिर्तीका लागि क्याम्प प्रशासन, क्षेत्रीय स्वायत्त प्रशासन, विदेशी सरकारहरू र अमेरिकी नेतृत्वको गठबन्धनबीच कडा सुरक्षा र समन्वय आवश्यक पर्दछ ।