भुसालको हुङ्कार : हामी आजको राजनीतिका वास्तविक प्रतिपक्ष हौँ

काठमाडौँ। नेपाल कम्युनिष्ट पार्टीका नेता घनश्याम भुसालले नेपालको लोकतन्त्र क्रमशः ‘गाईजात्रा’ र ‘महामूर्ख सम्मेलन’ मा परिणत हुँदै गएको बताउनुभएको छ । मंगलवार काठमाडौंमा चुनावी घोषणापत्र सार्वजनिक गर्दै उहाँले यस्तो टिप्पणी गर्नुभएको हो । राजनीतिक नेतृत्वमा हुनुपर्ने ‘राजनीतिक सङ्कल्प’ को अभावले सुशासन आउन नसकेको भुसालको भनाइ छ । आसन्न निर्वाचनलाई भुसालले ‘अवाञ्छित’ र ‘अपरिहार्य’ को संज्ञा दिनुभयो । नेपालको वैदेशिक सहयोग र अनुदानमा बाँच्ने इतिहासलाई उहाँले ‘अपमानको आधुनिक इतिहास’ भएको बताउनु भयो ।

लोकतन्त्रको गाईजात्रा र झुटको राजनीति
नेता भुसालले लोकतन्त्र क्रमशः ‘गाईजात्रा’ र ‘महामूर्ख सम्मेलन’ मा परिणत हुँदै गएकोमा चिन्ता व्यक्त गर्नुभयो । पञ्चायत कालमा व्यङ्ग्य साहित्यको माध्यमबाट विकृति देखाइने प्रचलन भएपनि अहिले लोकतन्त्रभित्रै नालायकीहरूको प्रदर्शन भइरहेको उहाँको तर्क छ । ‘चुनाव अहिले कसले सबभन्दा बढ्ता झुट बोल्नसक्छ र कसले सबभन्दा बढ्ता ढाँट्न सक्छ भन्ने प्रतिष्पर्धाको राष्ट्रिय मञ्च बनेको छ ।’ भुसालले भन्नुभयो । उहाँकाअनुसार यदि जनताले यो तथ्यलाई वास्ता गरेनन् भने मुलुकले गम्भीर ठक्कर खाने निश्चित छ ।

सडक र बाटोको फरकः गन्तव्यबिहीन विकास

विकासको चर्चा गर्दा सबैले ‘सडक’ को कुरा गरे पनि कसैले ‘बाटो’/दिशाको कुरा नगरेको भुसालको विश्लेषण छ । सडकले भौतिक संरचना मात्रै बताउँछ तर बाटोले गन्तव्य र दिशा निर्देश गर्छ । हरेक चुनावमा उही सडकका कुरा दोहोरिने तर मुलुक कता जाँदैछ भन्ने स्पष्ट मार्गचित्र नहुने गरेको उहाँको दाबी छ । नयाँ आएका शक्तिहरू र पुराना दलहरू सबैले घोषणापत्रमा उही ‘ढाँट्ने’ शैली अपनाएको र सारमा सबै एउटै रहेको उहाँले आरोप लगाउनुभयो । ‘सडकले बाटो बताउँदैन, दिशा बताउँदैन र गन्तव्य पनि बताउँदैन । हामी सडक चिल्लो बनाउने कुरा गर्दैछौँ तर हामी स्वयं कता जाँदैछौँ भन्नेकुरा हराएको छ ।’

अवाञ्छित तर अपरिहार्य निर्वाचन

आसन्न निर्वाचनलाई भुसालले ‘अवाञ्छित’ र ‘अपरिहार्य’ दुवै संज्ञा दिनुभएको छ । यो जनताले चाहेर भन्दा पनि असाधारण भवितव्यका कारण आएको चुनाव भएको उहाँको बुझाइ छ । जेन—जी प्रदर्शन, भ्रष्टाचार र मुठ्ठीभर नेताहरूको नालायकीले उत्पन्न गरेको संकटलाई समाधान नगरी चुनावमा जानु विस्फोटक स्थिति निम्त्याउनु भएको उहाँले चेतावनी दिनुभयो ।

परनिर्भरताको अपमानजनक इतिहास

नेपालको वैदेशिक सहयोग र अनुदानमा बाँच्ने इतिहासलाई उहाँले ‘अपमानको आधुनिक इतिहास’ भन्नुभएको छ । राजाको पालादेखि नै आएको अनुदानलाई उत्पादन वृद्धिमा लगाउन नसक्दा मुलुक परनिर्भर भएको उहाँको तर्क छ । भारत र चीन जस्ता छिमेकीहरूले आफ्नै बलमा विकास गर्दा नेपाल भने पश्चिमाहरूको उदारवादी र निजीकरणको ‘कुबाटो’ मा हिँडेर उद्योगहरू बेच्ने र बेरोजगार उत्पादन गर्ने ठाउँ बनेको उहाँको दाबी छ ।

उद्यमशीलताः कृषिलाई मेरुदण्ड बनाउने सङ्कल्प

मुलुकको अस्थिरता र द्वन्द्वको मुख्य कारण उद्यमको अभाव रहेको भुसालको ठम्याइ छ । ‘जसले उद्यम गर्दैन, त्यो मुलुक बर्बादी र गृहयुद्धमा फसिरहन्छ ।’ उहाँले भन्नुभयो ।
युवा पलायन रोक्नका लागि कृषिलाई नै उद्यमको आधार बनाउनुपर्ने उहाँको प्रश्ताव छ । हरेक किसान परिवारको मासिक ४० देखि ५० हजार रुपैयाँ बचत सुनिश्चित नहुन्जेल समृद्धिको कुरा बेकार रहेको उहाँले बताउनु भयो । कृषिलाई औद्योगिकरणसँग जोड्दै राष्ट्रिय पुँजीपतिको संरक्षण गर्ने नीति राज्यले लिनुपर्ने उहाँको जोड छ ।

भ्रष्टाचारविरुद्धको ‘घुस नखाने’ सङ्कल्प

राजनीतिक नेतृत्वमा हुनुपर्ने ‘राजनीतिक सङ्कल्प’ को अभावले सुशासन आउन नसकेको भुसालको भनाइ छ । उहाँले आफ्नो पार्टीलाई ‘घुस नखाने पार्टी’ को रूपमा चिनाउँदै यो केवल सस्तो नारा नभई एउटा गम्भीर सैद्धान्तिक र कार्यक्रमिक सङ्कल्प भएको स्पष्ट पार्नुभयो । राज्यका सबै तहमा हुने भ्रष्टाचारको छानबिन गरी अवैध सम्पत्ति राष्ट्रियकरण गर्नुपर्ने उहाँको माग छ ।

बहुध्रुवीय विश्व र नेपालको विदेश नीति

अन्तर्राष्ट्रिय परिस्थितिलाई क्यापिटलाइज गर्न नसक्नु अर्को ठूलो कमजोरी भएको उहाँले बताउनु भयो । अबको विश्व एकध्रुवीय नरही बहुध्रुवीय हुँदै गएको सन्दर्भमा बीआरआई, ब्रिक्स बैंक र एशियन इन्फ्रास्ट्रक्चर बैंक जस्ता निकायहरूसँग नेपालको आफ्नै शर्तमा साझेदारी गर्नुपर्ने उहाँको धारणा छ । विदेशीका ‘प्रेस्क्रिप्सन’ मानेर भन्दा पनि राष्ट्रिय हितलाई केन्द्रमा राखेर विदेश नीति सञ्चालन गर्नुपर्नेमा उहाँले जोड दिनुभयो। नेता भुसालले मुलुकलाई ठगिने र दुःख पाउने क्रमबाट जोगाउनका लागि आफ्नो पार्टीले ल्याएका एजेण्डाहरूमा बहस हुनुपर्ने र जनताले सही बाटो रोज्नुपर्ने बताउनुभयो ।

—न्युज एजेन्सी नेपाल