इजरायली हवाई हमलामा पूर्वी लेबनानको बेकाँ उपत्यकामा हिजबुल्लाह कमाण्डर हुसैन याघी मारिए

लेबनानको पूर्वी भाग बेकाँ उपत्यकामा शुक्रवार इजरायली हवाई हमलामा १० जना मारिएका छन् । अन्य २४ देखि ३५ जना घाइते भएका छन् । मारिएकामध्ये हिजबुल्लाहका वरिष्ठ कमाण्डर हुसैन मोहम्मद याघी/हुसैन याघी पनि परेका छन् । लेबनानका आधिकारिक तथा सुरक्षा स्रोतहरूले यो पुष्टि गरेका छन् । हुसैन याघी पूर्व हिजबुल्लाह सांसद मोहम्मद याघी ९जसलाई अबु सलीम पनि भनिन्छ० का छोरा हुन् र हिजबुल्लाहका संस्थापक सदस्यमध्ये एकका रूपमा चिनिन्छन् ।

हिजबुल्लाहले उनको शहादत घोषणा गर्दै लेबनान र यसका जनताको रक्षामा शहीद भएको भनेको छ । उनको अन्त्येष्टि शविबार हुने बताइएको छ । केही रिपोर्टहरूमा अन्य दुई हिजबुल्लाह कमान्डरहरू अली जायद अल–मुसावी र मोहम्मद इब्राहिम अल–मुसावी पनि मारिएको उल्लेख छ । लेबनानी सुरक्षा स्रोतकाअनुसार इजरायली विमानहरूले आवासीय क्षेत्र र हिजबुल्लाहका स्थलहरूमा कम्तीमा छवटा हमला गरेका थिए । घाइतेहरूलाई क्षेत्रीय अस्पतालहरूमा पु¥याइएको छ भने भग्नावशेषमुनि फसेकाहरूको खोजी कार्य जारी छ । बालबेक शहरमा केन्द्रित यी हमलाहरूमा बालबालिकासमेत घाइते भएको बताइएको छ ।

इजरायल डिफेन्स फोर्सेस/आईडीएफले जारी गरेको विज्ञप्तिमा भने बालबेकमा हिजबुल्लाहका कमान्ड सेन्टरहरूलाई निशाना बनाइएको दाबी गरेको छ । आईडीएफकाअनुसार यी सेन्टरहरूबाट हिजबुल्लाह लडाकुहरूले आईडीएफ सेना र इजरायलविरुद्ध आतंककारी हमला गर्न प्रयोग गर्दै आएका थिए । हिजबुल्लाहबाट तत्काल कुनै प्रतिक्रिया आएको छैन ।

गाजा युद्ध शुरु भएपछि/अक्टोबर २०२३ देखि हिजबुल्लाह र इजरायलबीच सीमा क्षेत्रमा द्वन्द्व चलिरहेको थियो । दुवै पक्षबीच नोभेम्बर २७, २०२४ मा युद्धविराम सम्झौता लागू भएको छ । तर इजरायलले समय–समयमा लेबनानमा हमला जारी राखेको छ र यसलाई हिजबुल्लाहको खतरा हटाउने उद्देश्यले गरिएको बताउँदै आएको छ । यो घटना युद्धविरामपछि पूर्वी लेबनानमा भएको सबैभन्दा घातक हमलाहरूमध्ये एक हो ।