साम्बाको उपचारका लागि कांग्रेसले ५ लाख दिने

काठमाडौँ। नेपाली कांग्रेसले राष्ट्रिय महिला फुटबल टोलीका कप्तान सावित्री भण्डारी ‘साम्बा’लाई उपचारका लागि ५ लाख रुपैयाँ सहयोग गर्ने घोषणा गरेको छ। कांग्रेसका उपसभापति विश्वप्रकाश शर्माले साम्बाको उपचारका लागि खेलाडीको उपचार कोषमा ५ लाख रुपैयाँ सहयोग गर्ने जानकारी गराउनुभएको हो।

उहाँले लेख्नुभएको छ, ‘एन्फा अध्यक्षलाई फोनमार्फत खेलाडीको उपचार कोषमा कांग्रेसका तर्फबाट पाँच लाख सहयोग गर्ने जानकारी गराएको छु। देशको प्रतिष्ठा बढाउन महत्त्वपूर्ण योगदान गर्नुभएको प्रसिद्ध फुटबल खेलाडी साम्बालाई यतिबेला हामी सबैले साथ दिन जरुरी छ। उहाँलाई शीघ्र स्वास्थ्यलाभको कामना गर्दछु!’ साम्बाले सोमबार मात्रै आफ्नो उपचारका लागि सामाजिक सञ्जालमार्फत सहयोगको याचना गर्नुभएको थियो।

यसपछि नेपाल फुटबल संघ (एन्फा) र सरकारले कुनै सहयोग नगरेको भन्दै सामाजिक सञ्जालमा आक्रोश व्यक्त भइरहेको छ। यसअघि काठमाडौँ मेडिकल कलेज (केएमसी)ले साम्बाका लागि निःशुल्क उपचार गरिदिने घोषणा गरेको छ।