विश्वकपको सुपर एटमा आज न्युजिल्याण्ड र श्रीलंका भिड्दै

काठमाडौं। आईसीसी टी–ट्वेन्टी विश्वकप अन्तर्गत सुपर एटमा आज इङ्ल्याण्ड र न्युजिल्याण्डबीच प्रतिस्पर्धा हुँदैछ।

श्रीलंकाको आर प्रेमादासा स्टेडियम कोलम्बोमा हुने खेल नेपाली समय अनुसार साँझ सवा ७ बजे सुरु हुनेछ।

सुपर एटको पहिलो खेलमा श्रीलंकालाई ५१ रन र दोस्रो खेलमा पाकिस्तानलाई २ विकेटले हराउँदै इङ्ल्याण्ड अन्तिम खेल अगाडिनै सेमिफाइनल पुगिसकेको छ।

२ पटकको विजेता इङ्ल्याण्ड अपराजित रहँदै नकआउट पुग्ने लक्ष्यमा छ। न्युजिल्याण्डका लागि भने यो खेल नै सेमिफाइनलको महत्वपूर्ण खेल हो। पहिलो खेलमा वर्षा बाधक बन्दा पाकिस्तानसँग १ अंक बाँडेको न्युजिल्याण्डले दोस्रो खेलमा श्रीलंकालाई ६१ रनले हराउँदै सेमिफाइनल पुग्ने सम्भावना बलियो बनाएको हो।

२ खेलबाट ३ अंक जोडे पनि ढुक्क हुने अवस्था भने छैन। जितले न्युजिल्याण्डलाई समूह २ को विजेता बनाउने छ। तर इङ्ल्याण्डसँग हारेको खण्डमा अर्को खेलमा श्रीलंकाविरुद्ध पाकिस्तानको हारले मात्र न्युजिल्याण्डलाई अन्तिम ४ को ढोका खुल्नेछ।

यसर्थ यो खेलले समूह विजेताको टुङ्गो लगाउनेछ। इङ्ल्याण्ड र न्युजिल्याण्डबीच अहिलेसम्म ट्वेन्टी ट्वेन्टी ढाँचामा ३० खेल भएका छन्।

जहाँ इङ्ल्याण्डले १६ खेल जित्दा १० खेल न्युजिल्याण्डले जितेको छ। १ खेल बराबरी हुँदा ३ खेल नतिजाविहीन छ।

२०२१ को विश्वकप सेमिफाइनलमा न्युजिल्याण्डले इङ्ल्याण्डलाई हराएर पहिलो पटक फाइनलमा स्थान बनाएको थियो।