निर्वाचनमैत्री होली मनाऔँ : निर्वाचन आयोग

वीरगञ्ज। निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारीले देशभर निर्वाचनको तयारी अघि बढिरहेको बताउनुभएको छ।

पर्सा र बारा जिल्लाको ‘निर्वाचन सुरक्षाको वर्तमान अवस्था, चुनौती र समाधान’ विषयक छलफल कार्यक्रममा देशभर निर्वाचनमैत्री वातावरण बनेको उनले उल्लेख गर्नुभयो।

उहाँले  भन्नुभयो “अहिले निर्वाचन आचारसंहिता उल्लंघनका घटना न्यून छन्। निर्वाचन प्रचारप्रसारमा मितव्ययिता कायम भएको छ। निषेधको राजनीति अहिले निषेध भएको छ।”

कार्यवाहक प्रमुख निर्वाचन आयुक्त भण्डारीले विगतको तुलनामा निर्वाचन आचारसंहिता उल्लङ्घनका घटनामा कमी आएको दाबी गर्नुभयो।

“होली, निर्वाचन आचारसंहिता र निर्वाचनलाई सँगसँगै लैजादैँ छौँ”, उहाँले भन्नुभयो, “निर्वाचनमैत्री होली मनाउन आयोग सम्पूर्णलाई अनुरोध गर्दछ। होली र निर्वाचन सँगसँगै अघि बढाउनेछौँ। यसमा सबैको साथ र सहयोग अनिवार्य छ।”

कार्यवाहक प्रमुख निर्वाचन आयुक्त भण्डारीले होली पर्व निर्वाचनमैत्री, शान्तिपूर्ण र सौहार्दपूर्ण ढङ्गले मनाउन आह्वान गर्नु‍‍भयो।