इरानका रक्षामन्त्री मारिएको दावी

इजरायलले शनिबार इरानको राजधानी तेहरानसहित धेरैवटा सहरमा भीषण हवाई हमला गरेको छ।

यसैबिच स्रोतलाई उद्धृत गर्दै रोयटर्सले आक्रमणमा इरानका रक्षामन्त्री अमिर नासिरजादेह र रिभोलुसनरी गार्ड्स (आईआरजीसी) का कमान्डर मोहम्मद पाकपुर मारिएको दाबी गरेको छ।

रोयटर्सले लेखेको छ, ‘इजरायलको सैन्य कारबाहीसँग सम्बन्धित दुई स्रोत र एक क्षेत्रीय स्रोतले भनेका छन्- इजरायली आक्रमणमा इरानका रक्षामन्त्री अमिर नासिरजादेह र रिभोलुसनरी गार्ड्सका कमान्डर मोहम्मद पाकपुर मारिएका छन्।’

यसअघि इरानी समाचार एजेन्सीले दक्षिणी इरानको एक विद्यालयमा मिसाइल प्रहार हुँदा ४० जना विद्यार्थीको मृत्यु भएको र ४५ जना घाइते भएको उल्लेख गरेको थियो।

इजरायलले अमेरिकासँग मिलेर शनिबार बिहान राजधानी तेहरानसहित इरानका १० सहरमा हवाई आक्रमण गरेको हो।

आक्रमणपछि अमेरिकाका राष्ट्रपति डोनाल्ड ट्रम्पले भिडिओ सन्देश जारी गर्दै इरानविरुद्ध हमला अमेरिकी नागरिकको सुरक्षाका लागि भएको बताएका छन्।

जवाफमा इरानले पनि इजरायलविरुद्ध झन्डै ४०० वटा मिसाइल प्रहार गरेको छ भने कतार, कुवेत, जोर्डन, बहराइन, साउदी अरेबिया र यूएईमा रहेका अमेरिकी आधार शिविरलाई निसाना बनाएको छ।

साथै इरानले यूएईको सबैभन्दा बढी जनसंख्या भएको सहर दुबईमा पनि आक्रमण गरेको छ।