आईसीसी टी–२० विश्वकप २०२६ : श्रीलंकाविरुद्ध जित निकाल्दा पनि पाकिस्तान बाहिरियो, न्युजिल्यान्ड ‘भाग्यशाली’ बन्दै सेमिफाइनलमा

काठमाडौं। पाकिस्तान आईसीसी टी–२० विश्वकप २०२६ बाट बाहिरिएको छ । शनिबार भएको सुपर ८ को खेलमा श्रीलंकाविरुद्ध आवश्यक अन्तरको जित हासिल नभएपछि पाकिस्तान सुपर आठबाटै घर फर्किएको हो ।

पाकिस्तान बाहिरिएसँगै सुपर ८ को समूह २ बाट न्युजिल्यान्ड सेमिफाइनलमा पुगेको छ । यो समूहबाट इंग्ल्यान्ड ३ जितसहित यसअघि नै सेमिफाइनलमा पुगिसकेको थियो । न्युजिल्याण्डले पाकिस्तानलाई रनरेटमा पछि पार्दै सेमिफाइनलमा पुगेको हो । पाकिस्तान सेमिफाइनलमा पुग्नका लागि श्रीलंकालाई १४७ रनभन्दा कम योगफलमा रोक्नु पर्ने थियो । तर श्रीलंकाले उत्कृष्ट ब्याटिङ गरेपछि पाकिस्तान बाहिरिएको हो । यदपी श्रीलंकामाथि पाकिस्तानले ५ रनको जित निकालेको छ ।

पाकिस्तानले दिएको २१३ रनको लक्ष्य पछ्याएको श्रीलंका २०७ रनमा समेटियो । निर्धारित २० ओभरमा ७ विकेट गुमाउँदै श्रीलंकाले उक्त स्कोर बनाएको हो । श्रीलंका लागि कप्तान दासुन शनाकाले शानदार ब्याटिङ गर्दै ३१ बलमा ७६ रन बनाए । यस्तै पवन रथनायकेले ५८, कामिल मिश्राले २६ र चारिथ असलंकाले २५ रनको योगदान दिए ।

पाकिस्तानका अबरार अहमदले शानदार बलिङ गर्दै तीन विकेट लिए । चार ओभर बलिङ गरेका उनले मात्रै २३ रन खर्चिए । यस्तै नसीम शाह, शाहीन अफ्रिदी, मोहम्मद नवाजले एक एक विकेट लिए ।

त्यसअघि पल्लेकेले अन्तर्राष्ट्रिय क्रिकेट रंगशालामा टस हारेर ब्याटिङ गरेको पाकिस्तानले निर्धारित २० ओभरमा ६ विकेट गुमाउँदै २१२ रन बनाएको थियो। पाकिस्तानका लागि ओपनर साहिबजादा फरहान र फखर जमानले विष्फोटक ब्याटिङ गर्दै टोलीलाई विशाल स्कोर तर्फ अघि बढाएका थिए ।

फरहानले ६० बलमा शतक प्रहार गरे । जसक्रममा उनले ९ चौका र ५ छक्का प्रहार गरे । ४२ बलको सामना गरेका जमानले ९ चौका र ४ छक्कासहित ८५ रन बनाए । पाकिस्तानका अन्य ब्याट्सम्यानले दोहोरो अंकमा रन बनाउन सकेनन् ।

श्रीलंकाका लागि दिलशान मदुशंकाले तीन, दासुन शनाकाले दुई र दुष्मन्थ चमेराले एक विकेट लिए ।