सुरक्षानिकाय कुनै पनि चुनौती समाधान गर्न सक्षम रहेको प्रमाणित : आईजीपी अर्याल

काठमाडौँ। सशस्त्र प्रहरी बलका महानिरीक्षक (आईजीपी) राजु अर्यालले निर्वाचनले सुरक्षा व्यवस्थापनका हिसाबले सुरक्षानिकाय सक्षम प्रमाणित भएको बताउनुभएको छ।

बिहीवार आईजीपी अर्यालले सबै सुरक्षानिकाय, गृह मन्त्रालय र सरकारको दृढ अठोटका कारण सुरक्षा व्यवस्थापन प्रभावकारी भएको बताउनुभयो।

उहाँले गृहमन्त्रीदेखि सिपाहीसम्मका सुरक्षाकर्मीले जिम्मेवारीपूर्वक काम गरेको उल्लेख गर्नुभयो। निर्वाचनले देशको भविष्य र राष्ट्रको सुरक्षासँग प्रत्यक्ष सम्बन्ध राख्ने भएकाले सबै निकायले समन्वय गरेर काम गरेको बताउनुभयो।

उहाँले विभिन्न चुनौती र विषम परिस्थितिको सामना गर्नुपरे पनि सुरक्षानिकायले ती समस्याको विश्लेषण गर्दै एकीकृत सुरक्षा योजनानुसार काम गरेको बताउनुभयो। उहाँले सुरक्षानिकायहरू जस्तोसुकै चुनौती समाधान गर्न सक्षम रहेको प्रमाणित गरेको कथन छ।

अर्यालले भन्नुभयो, ‘हामीले निकै चुनौती सामना गर्नुपर्‍यो। एकदमै विषम परिस्थिति थियो। देखापरेका चुनौतीलाई हामीले राम्रोसँग केलायौँ। कसैले पनि समयमा निर्वाचन हुँदैन भन्थे। हामीले सबैलाई बुझाउने कोसिस गर्‍यौँ। आज नेपालका सुरक्षानिकायहरू जस्तोसुकै समस्या समाधान गर्न सक्षम छन् भन्ने कुरा प्रमाणित भएको छ।’