कैलालीमा प्रहरी जवानको मृत्यु, छानबिन समिति गठन

धनगढी। कैलालीमा एक प्रहरी जवानको मृत्यु भएको छ । इलाका प्रहरी कार्यालय टीकापुरमा कार्यरत प्रहरी जवान ३० वर्षीय सन्देशबहादुर चनाराको मृत्यु भएको हो। सोही कार्यालयको छतबाट खसेर उनको मृत्यु भएको प्रारम्भिक अनुसन्धानबाट खुलेको कैलाली प्रहरीका प्रवक्ता एवं डीएसपी योगेन्द्र तिमिल्सिनाले जानकारी दिनुभयो।

सोमबार राति ११ करिब बजे चनारालाई अर्का सुरक्षाकर्मीले लडेको अवस्थामा भेटेका थिए। अस्पताल पुर्‍याइएपछि चिकित्सकले उनलाई मृत घोषणा गरेका प्रहरीले जनाएको छ ।

बझाङका बासिन्दा चनारा ६ महिनायता उक्त कार्यालयमा कार्यरत थिए । उनको मृत्यु घटनाका विषयमा थप छानबिन गर्न डीएसपी तिमिल्सिनाको संयोजकत्वमा समिति बनाइएको छ । घटनाबारे अनुसन्धान भइरहेको उहाँले जानकारी दिनुभयो।