पृथ्वी राजमार्गमा डेढ घण्टादेखि ट्राफिक जाम

काठमाडौँ। धादिङको पृथ्वी राजमार्गअन्तर्गत गजुरीदेखि कुरिनटारसम्मको सडक खण्डमा मंगलबार डेढ घण्टादेखि ट्राफिक जाम भएको छ।

एउटा ट्रक बिग्रिएपछि सडक अवरुद्ध हुँदा सवारीसाधन लामो समयसम्म रोकिएका छन्।

इलाका प्रहरी कार्यालय गजुरीका अनुसार सडकको बीच भागमै ट्रक बिग्रिएपछि सो क्षेत्रमा सवारी साधनको लामो लाइन लागेको छ।

प्रहरी र ट्राफिक प्रहरीले अहिले सडकलाई एकतर्फी रूपमा सञ्चालन गर्दै जाम खुलाउने प्रयास गरिरहेका छन्।

प्रहरीका अनुसार बिग्रिएको ट्रक हटाउने काम जारी रहेको र केही समयमै जाम पूर्ण रूपमा खुल्नेछ। यात्रु तथा सवारी चालकलाई धैर्यपूर्वक यात्रा गर्न आग्रह गर्न प्रहरीले जनाएको छ।

पृथ्वी राजमार्ग राजधानी काठमाडौंलाई देशका पश्चिमी तथा मध्य भूभागसँग जोड्ने मुख्य मार्ग भएकाले यसलाई ‘काठमाडौँको लाइफलाइन’का रूपमा लिने गरिन्छ।

यही सडक अवरुद्ध हुँदा राजधानी भित्रिने तथा बाहिरिने सवारीसाधन प्रभावित भएका छन्।