नेपालमा उच्चस्तरको फुटबल खेल्न सक्ने सीमित मात्र खेलाडी छन् : मुख्य प्रशिक्षक

काठमाडौँ। नेपाली राष्ट्रिय फुटबल टोलीका नवनियुक्त मुख्य प्रशिक्षक गुग्लीइल्मो एरिनाले नेपालसँग उच्चस्तरको फुटबल खेल्नसक्ने सीमित मात्र खेलाडी रहेको बताउनुभएको छ।

सातदोबाटोस्थित एन्फा कम्प्लेक्समा भएको पत्रकार सम्मेलनमा नवनियुक्त मुख्य प्रशिक्षक गुग्लिइल्मो एरिनाले अन्तर्राष्ट्रिय प्रतियोगिता खेल्नका लागि नेपालसँग उच्चस्तरको फुटबल खेल्न सक्ने ३०/३५ जना फुटबलर रहेको बताउनुभएको हो। यो संख्यामा वृद्धिका लागि आफूले काम गर्नुपर्ने उहाँले बताउनुभयो।

एरिनाले आगामी जुन ५ तारिखमा हङकङसँग हुने मैत्रीपूर्ण फुटबल र अक्टोबरमा बंगलादेशमा हुने साफ च्याम्पियनसिपका लागि बलियो नेपाली टोली निर्माण गर्ने लक्ष्य रहेको बताउनुभयो।

नेपाली टोलीमा सुधार आवश्यक रहेको र त्यसबारे आफूले अध्ययन गरिसकेको उहाँको भनाइ छ। पछिल्ला २-३ वर्षदेखि नेपाली टोलीबारे नियाल्दै आएको उहाँले बताउनुभयो। ‘केही पक्षमा सुधार आवश्यक छ’, उहाँले भन्नुभयो, ‘खेलाडीहरूमा राम्रो प्रदर्शन गर्दा राम्रो सम्झौताहरू पाउँछौं भन्ने विश्वास भयो भने त्यसअनुरूप नतिजा पनि सुखद आउँछ।’

प्रशिक्षक एरिनाले राष्ट्रिय टिममा बस्नका लागि खेलाडीहरूको आत्मविश्वास पनि बलियो हुनुपर्ने आवश्यकतामा जोड दिनुभयो।

एरिनासँग एन्फाले बिहीबार मात्र उनीसँग एक वर्षका लागि सम्झौता गरेको थियो।