हामीले गरेका राम्रा काम जनतालाई बुझाउन सकेनौँ, हार्‍यौँ : लेखराज भट्ट

काठमाडौँ। नेकपा एमालेका उपमहासचिव लेखराज भट्टले सरकारमा रहँदा गरेका राम्रा कामहरू जनतालाई सही ढङ्गले बुझाउन नसक्दा एमालले अहिलेको परिणाम भोग्नुपरेको बताउनुभयो।

भट्टले गत भदौ २३ र २४ गतेका घटनाक्रमलाई जनतासमक्ष सही रूपमा संप्रेषण गर्न नसक्नु पार्टीको मुख्य कमजोरी रहेको पनि बताउनुभयो। अध्यक्ष केपी शर्मा ओली निवासमा बसेको सचिवालय बैठकपछि प्रतिक्रिया दिँदै उपमहासचिव लेखराज भट्टले आफूले देखेका कमजोरीहरू पार्टी कमिटीमै राख्ने बताउनुभयो।

‘हामीले गरेका कामलाई तलसम्म जनतासँग पुर्‍याउन सकेनौँ’, उहाँले भन्नुभयो,’भदौ २३ र २४ को घटनालाई पनि ठीक ढङ्गले जनतासमक्ष सम्प्रेषण गर्न सकेनौँ। त्यसको परिणाम नै अहिले हामीले भोगिरहेका छौँ र यसलाई स्वीकारेर अगाडि बढ्नुपर्छ।’

ती घटनाक्रम कसरी भए, त्यसमा पार्टी र नेतृत्वको भूमिका के थियो भन्ने यथार्थ कुरा जनतामाझ पुग्न नसक्दा पर्दा पछाडिका खेलहरूले प्रश्रय पाएको भट्टले बताउनुभयो। निर्वाचन वा राजनीतिक घटनाक्रमको समीक्षा पार्टीभित्र तल्लो तहबाटै स्वतःस्फूर्त रूपमा शुरु भइसकेको दाबी उहाँले भन्नुभयो।