वर्षासँगै ह्वात्तै घट्यो वायु प्रदूषण

काठमाडौँ। शुक्रबारदेखि मुलुकका अधिकांश ठाउँमा परेको वर्षासँगै वायु प्रदूषण उल्लेखनीय रूपमा घटेको छ।

एयर क्वालिटी इन्डेक्स (एक्युआई) को तथ्यांक विश्लेषण गर्दा सात दिनअघि वायु प्रदूषण १७८ एक्युआई पुगेर काठमाडौँ विश्वकै दोस्रो प्रदूषित शहरको सूचीमा थियो। आज भने वायु प्रदूषण घटेर ६० एक्युआईमा झरेको छ।

योसँगै काठमाडौँ विश्वका प्रदूषित शहरको सूचीमा ६७औँ स्थानमा छ। एक्युआई मापदण्डअनुसार ० देखि ५० सम्म ‘राम्रो’ मानिन्छ भने ५१ देखि १०० सम्म ‘सचेत रहनुपर्ने’ श्रेणीमा पर्छ। १०१ देखि १५० ‘अस्वस्थ’ मानिन्छ, जसले विशेष गरी श्वासप्रश्वास तथा मुटुरोगीलाई असर गर्नसक्छ। यस्तै १५१ देखि २०० ‘सबैका लागि अस्वस्थ’, २०१ देखि ३०० ‘धेरै अस्वस्थ’ र ३०० भन्दा माथि ‘अत्यन्त खतरनाक’ मानिन्छ।

वातावरण विभागका महानिर्देशक ज्ञानराज सुवेदीले शुक्रबार र शनिबार हावाहुरीसहित परेको वर्षाका कारण वायु प्रदूषण घटेको बताउनुभयो। उहाँका अनुसार वर्षाले हावामा रहेका धुलो तथा प्रदूषणका कण जमिनमा झार्छ भने हावाहुरीले ती कण उडाएर अन्यत्र लैजाने हुँदा प्रदूषण कम हुन्छ।

“यदि लामो समयसम्म वर्षा भएन र मौसम सुक्खा रह्यो भने वायुमण्डलमा धुलोका कण थुप्रिँदै जान्छन्”, महानिर्देशक सुवेदीले भन्नुभयो, `काठमाडौँ कचौरा आकारको शहर भएकाले प्रदूषण सजिलै बाहिर निस्कन सक्दैन।”