आयात बढ्दा पनि ग्यास अभाव कायमै

काठमाडौँ। खाना पकाउने ग्यासको आयात बढे पनि बजारमा उपभोक्ताले भने अझै सहज रूपमा पाउन सकेका छैनन् । भन्सार विभागको तथ्याङ्क अनुसार चालु आर्थिक वर्ष २०८२/८३ को माघसम्म तीन लाख २१ हजार ८९ मेट्रिक टन ग्यास आयात भएकोमा फागुनमा मात्र तीन लाख ७२ हजार २८१ मेट्रिक टन ग्यास आयात भएको छ । माघको तुलनामा फागुन महिनामा ५१ हजार मेट्रिक टनभन्दा बढी ग्यास आयात भएको तथ्याङ्कले देखाएको छ । ५१ हजार मेट्रिक टन ग्यासले ३६ लाख ५० हजार ग्यास सिलिन्डर भरिन्छन् । ग्यास आयात बढ्दा पनि बजारमा एउटा सिलिन्डर हुने उपभोक्ताले ग्यास पाउन सकेका छैनन् ।

नेपाल एलपी ग्यास उद्योग सङ्घका अध्यक्ष दिवान चन्दले अभाव हुने आशङ्कामा घर घरमा ग्यास सञ्चय गर्न थालेपछि ग्यासको माग बढी भएको जानकारी दिनुभयो । ग्यासको आयात बढेकाले अभाव क्रमशः घट्दै गएको उहाँले जानकारी दिनुभयो ।

आधा सिलिन्डर बेच्न थालेपछि ग्यासको आपूर्ति सहज बन्दै गएको उहाँको भनाइ छ । अत्यावश्यक पर्नेले मात्र आधा सिलिन्डर लाने र अन्यले भरी आएपछि मात्र लाने भनेर फर्कने गरेको उहाँको भनाइ छ ।

बजारमा एक करोड ४२ लाख हजार ग्यास सिलिन्डर रहेका र एउटै घरमा धेरै सिलिन्डर भरेकाले पनि ग्यासको माग बढ्दै गएको उहाँको भनाइ छ । उच्च वर्गको परिवारमा एउटै घरमा चारदेखि पाँच वटा वटासम्म सिलिन्डर हुने गर्छन् । ग्यासको अभाव हुन सक्ने आशङ्कामा अधिकांश घरमा आवश्यकताभन्दा बढी सिलिन्डर भरेर राखिएका छन् । त्यसैका कारणले गर्दा पनि ग्यास अभाव कायम रहेको हो ।

नेपाल आयल निगमका प्रवक्ता मनोज ठाकुरले ग्यासको आयात नियमित भइरहेकाले अभाव कम हुँदै गएको जानकारी दिनुभयो । ग्यास नियमित आयात भइरहेकाले अनावश्यक ग्यास सञ्चय नगर्न उपभोक्तालाई उहाँले आग्रह गर्नुभयो । निगमका अनुसार अनुसार सामान्य अवस्थामा बजारमा मासिक ४५ हजारदेखि ४९ हजार मेट्रिक टन ग्यासको माग रहेको छ । पश्चिम एसियाली मुलुकमा भएको युद्धको प्रभावले ग्यास अभाव हुने आशङ्कामा बजारमा ग्यासको माग ह्वात्तै बढेको हो । बजारमा ग्यासको आपूर्ति सहज बनाउन निगमले २८ फागुनदेखि आधा सिलिन्डर ग्यास बेचिरहेको छ । ग्यासको आयात बढे पनि साना होटेल रेस्टुरेन्ट र होस्टेलमा ग्यास अभाव कायम रहेको छ ।

पछिल्लो समय भारतमा ग्यासको मूल्य बढेको छ । एक साताअघि इन्डियन आयल कर्पोरेसन ९आइओसी० ले पठाएको मूल्य अनुसार ग्यास प्रतिसिलिन्डर २१६ रुपियाँ मूल्य बढेर आएको छ । निगमले मूल्य बढेर आए पनि उपभोक्ताको हितलाई ध्यानमा राखेर मूल्यवृद्धि नगरेको जनाएको छ । बजारमा ग्यासको मूल्य प्रतिसिलिन्डर एक हजार ९१० रुपियाँ छ ।