प्रधानमन्त्री कप : मधेश र सुदूरको दोस्रो जित

काठमाडौँ। ब्याटरले संघर्ष गर्नुपरेको खेलमा मधेश र सुदूरपश्चिम प्रदेशले प्रधानमन्त्री एकदिवसीय क्रिकेट प्रतियोगितामा दोस्रो जित आत्मसात गरेका छन्।

मधेशको दुई जिल्लामा शुक्रवार भएको खेलमा घरेलु टोली मधेशले लुम्बिनी प्रदेशमाथि २५ रन र सुदूरपश्चिमले कोशी प्रदेशमाथि सात विकेटको जित निकाल्यो। यससँगै जारी प्रधानमन्त्री कपमा तेस्रो खेलबाट मधेश र सुदूरपश्चिमले दोस्रो जित आत्मसात् गर्‍ यो। ब्याटरले संघर्ष गर्नुपरेको दुवै खेलमा न्युन योगफल बन्यो। तर मधेश र सुदूरपश्चिम भने जित निकाल्न सफल रहे। वीरगञ्जमा भएको खेलमा कोशीले १३१ रनको सामान्य लक्ष्य दिएको थियो। तर, सुदूरपश्चिमले १९.५ ओभरमा मात्र तीन विकेटको क्षतिमा लक्ष्य भेट्टायो।

जनकपुरमा भएको अर्को खेलमा मधेशले पनि १२४ रनको लक्ष्य दिएको थियो। तर, लुम्बिनी त्यो लक्ष्य भेट्टाउन असफल भयो। २६औं ओभरमा नै लुम्बिनी ९९ रनमा अलआउट भयो। मधेशको जितमा २२ वर्षे बलर विशाल पटेलले पाँच विकेट लिए। उनी म्यान अफ दी म्याच पनि भए। सुदूरपश्चिमको जितमा पनि मध्यम गतिका बलर हेमन्त धामी निर्णायक साबित भए। उनले चार विकेट लिए। जुन म्यान अफ दी म्याचको हकदार पनि बन्यो।

सामान्य लक्ष्य सुदूरपश्चिमले १९।५ ओभरमा मात्र तीन विकेट गुमाएर पूरा गरेको हो। सुदूरपश्चिमले छिट्टै दुई विकेट गुमाएको थियो। तर खडक बोहोराले ६६ रनको अर्धशतकीय इनिङको योगदान दिँदै जितको आधार तय गरे। उनले ४५ बलको सामना गर्दै ९ चौका र तीन छक्का प्रहार गरेका थिए। किरन ठगुन्नाले २५ रनमा अविजित रहँदै खडकलाई साथ दिए। ओपनरद्वय अभिषेक पाल १४ रन र प्रकाश पाण्डे ४ रनमै आउट भए। कोशीको बलिङमा विपिन महतोले दुई र ज्ञानेन्द्र श्रेष्ठले १ विकेट लिए।

वीरगञ्जको नारायणी क्रिकेट मैदानमा टस हारेर पहिले ब्याटिङ गरेको कोशी ४३.४ ओभरमा १३० रनमै अलआउट भयो।

मध्य क्रमका ब्याटर शिवांश बजगाईं २५ रन बनाए। यो नै सर्वाधिक ठूलो योगफल रह्यो। सुमन श्रेष्ठ २४, दीपेश कँडेल २० र फिर्दोश अन्सारी १८ रनमा आउट भए। सुदूरपश्चिमको बलिङमा हेमन्तले चार तथा किरण ठगुन्नाले दुई तथा नारायण जोशी र सौर्य श्रेष्ठले समान एक विकेट लिए। हेमन्तले ९ ओभर २६ रन मात्र दिए। तीन खेलबाट सुदूरपश्चिमले चार अंक जोड्दा कोशीको चौथो खेलमा तेस्रो हार हो। मधेशसँगको पहिलो खेल वर्षा कारण प्रभावित हुँदा कोशीले एक अंक पाएको थियो।

झिनो लक्ष्यको रक्षा

स्पिनर विशाल पटेलले पाँच विकेटसँगै उत्कृष्ट किफायती बलिङ गरेपछि मधेशले झिनो लक्ष्य रक्षा गरेको हो। झिनो लक्ष्य पछ्याएको लुम्बिनीले १० रन जोड्दा नै तीन विकेट गुमाइसकेको थियो।