संयुक्त राष्ट्रसंघका मानवअधिकार प्रमुखद्वारा इरानी विद्यालयमा भएको आक्रमणको अनुसन्धान निष्कर्षमा पुर्‍याउन आग्रह

संयुक्त राष्ट्रसंघका मानवअधिकार उच्चायुक्त भोल्कर टर्कले अमेरिकालाई इरानको एउटा प्राथमिक विद्यालयमा भएको आक्रमणको अनुसन्धान तत्काल निष्कर्षमा पु¥याउन र त्यसका निष्कर्षहरू सार्वजनिक गर्न आग्रह गर्नुभएको छ । उहाँले ‘भयानक क्षतिको न्याय हुनुपर्ने’ कुरामा जोड दिनुभयो । संयुक्त राष्ट्रसंघीय मानवअधिकार परिषद्को ६१ औं सत्रमा आयोजित एक जरुरी बहसमा भिडियो सन्देशमार्फत टर्कले प्राथमिक विद्यालयमा भएको बमबारीले ‘भयानक त्रास’ पैदा गरेको बताउनुभयो ।

मिनाबको शजरेह तय्येबेह प्राथमिक विद्यालयमा भएको बमबारीले गहिरो त्रास जगाएको छ । बमबारी गरिएका कक्षाकोठाहरू र शोकमा डुबेका अभिभावकहरूको तस्विरले युद्धको सबैभन्दा ठूलो मूल्य कसले चुकाउँछ भन्ने स्पष्ट पारेको छ। देशहरूबीच जस्तोसुकै मतभेद भएपनि, विद्यालयका बालबालिकाहरूलाई मारेर ती समस्या समाधान हुँदैनन् भन्ने कुरामा आफूहरु सहमत हुनसक्ने बताउनुभयो ।

इरानमा द्वन्द्व अघि बढ्दै जाँदा, अमेरिकी र इजरायली आक्रमणहरूले बढ्दो रूपमा घना बस्ती भएका आवासीय क्षेत्रहरूमा प्रहार गरेका छन् । नागरिक पूर्वाधारहरू नष्ट गरेका छन् । परमाणु सुविधाहरूलाई निशाना बनाउनु बुझ्न नसकिने हदसम्म लापरबाही हो । मध्यपूर्व र खाडी क्षेत्रमा सैन्य तनाव खतरनाक स्तरमा पुगिरहेको छ । यो अन्त्य हुनुपर्छ । प्रत्यक्ष रूपमा संलग्न देशहरूमा थप संक्रमण र नागरिक पीडा बढ्ने उच्च जोखिम छ ।