महिला प्रधानमन्त्री टी २० कप क्रिकेट : उपाधि हत्याउन इन्दु र विन्दुको भिडन्त

काठमाडौं। महिला प्रधानमन्त्री टी–२० कप क्रिकेटको उपाधिका लागि विभागीय टिम एपीएफ र सुदूरपश्चिम आमनेसामने हुने भएका छन्। बागमती प्रदेशलाई ३० रनले पराजित गर्दै सुदूरपश्चिम प्रदेशले फाइनलमा स्थान पक्का गरेको हो।

सुदूरले दिएको ११३ रनको लक्ष्य पछ्याएको बागमतीले दुई बल बाँकी रहँदा सबै विकेट गुमाउँदै ८२ रन मात्रै बनाउन सक्यो।

योसँगै एपीएफबाहेक तीन टोलीले समान दुई अंक जोडेका थिए। तर, नेट रनरेटमा अगाडी रहँदै सुदूरपश्चिमले एपीएफसँगको भेट पक्का गर्‍यो। सुदूरपश्चिमको –०।७४१ नेट रनरेट रह्यो। आर्मीको –१.३२७ र बागमतीको –१.४६३ नेट रनरेट रह्यो।

योसँगै उपाधिका लागि साबिक विजेता एपिएफ र सुदूरपश्चिम भिड्ने भएका छन्। शुक्रबारकोअर्को खेलमा एपीएफले त्रिभुवन आर्मी क्लबलाई ६९ रनले पराजित गर्दै यसअघि नै फाइनलमा स्थान बनाइसकेको छ। रोचक कुरा चाहिँ, एपीएफको कप्तान इन्दु बर्मा राष्ट्रिय टोलीकी कप्तान हुन् भने सुदूरपश्चिमकी कप्तान राष्ट्रिय टिमकी उपकप्तान हुन्।

एउटै टोलीबाट राष्ट्रिय प्रतियोगिता खेल्ने यी दुई खेलाडीबीच प्रधानमन्त्री कपमा आमनेसामने हुने भएका छन्। एपीएफ साविक विजेता भएकाले उपाधिको दावेदार हो। राष्ट्रिय टोलीका अधिकांश खेलाडी एपीएफसँग छन्। यता, सुदूरपश्चिम पनि क्रिकेटका राष्ट्रिय खेलाडी उत्पादन गर्ने कारखाना हो। सुदूरपश्चिमसँग पनि भविष्य बोकेका खेलाडी छन्। यसले यी दुईको प्रतिस्पर्धा रोचक बन्ने अनुमान छ।