पूर्वमन्त्री भीम आचार्यसँग साढे दुई लाख धरौटी माग

काठमाडौं। पोखरा अन्तर्राष्ट्रिय विमानस्थलसम्बन्धी भ्रष्टाचार मुद्दामा पूर्वमन्त्री तथा नेकपा (एमाले)का नेता भीम आचार्यसँग विशेष अदालतले साढे २ लाख धरौटी माग गरेको छ।

पूर्वमन्त्री आचार्य सोमबार विशेष अदालतमा उपस्थित हुनुहुन्थ्यो। विशेष अदालतका न्यायाधीशहरू नारायणप्रसाद पौडेल, हेमन्त रावल र उमेश कोइरालाको इजलासले धरौटीमा छाड्ने आदेश दिएको हो। उहाँ धरौटी बुझाउने प्रक्रियामा रहनुभएको छ।

उहाँ पर्यटनमन्त्री हुँदा विमानस्थलको लागत अस्वाभाविक रुपमा बढाएर अनियमितता गरेको दाबीसहित अख्तियार दुरुपयोग अनुसन्धान आयोगले गत मंसिर २१ मा मुद्दा दर्ता गरेको थियो।

यस मुद्दामा ५५ जनालाई विपक्षी बनाइएको छ। उहाँहरूबाट आठ अर्ब ३६ करोड रुपैयाँ बराबरको बिगो कायम गरी असुल उपर गर्न माग दाबी गरिएको छ।