पीएम कप : एपिएफमाथि पुलिसको उत्कृष्ट जीत

काठमाडौं  नेपाल पुलिस क्लबले सशस्त्र प्रहरी बल (एपीएफ) क्लबमाथि १८५ रनको शानदार जित दर्ता गरेको छ।

प्रधानमन्त्री कप एक दिवसीय क्रिकेटमा आज एपीएफ विरुद्ध माथिल्लो मुलपानी मैदानमा टस हारेर ब्याटिंग गरेको पुलिसले ५० ओभरमा ९ विकेट गुमाएर ३५५ रन बनायो।

खेलमा पुलिसका ४ जना ब्याटरले अर्धशतक बनाए। दिनेश खरेलले ६०, शंकर रानाले ६१, दिल्साद अलिले ५१ तथा कप्तान आरिफ शेखले ५० रन बनाए।

३५६ रनको कठिन लक्ष्य पछ्याएको एपीएफ क्लब ४४ ओभरमा १७० रनमै समेटियो। पुलिसका बलरहरूले सुरुदेखि नै दबाब सिर्जना गर्दै विपक्षी टोलीलाई ठूलो साझेदारी गर्न दिएनन्। खेलका ‘प्लेयर अफ द म्याच’ दिनेश खरेल घोषित भए।

पहिलो खेलमा आर्मीसँग पराजित भएको पुलिसले पहिलो जितदर्ता गरेको छ।