रास्वपाले जेल नफोडेको रविको निष्कर्ष, भीडले ठेलेर बाहिर निस्केको दाबी

काठमाडौँ। राष्ट्रिय स्वतन्त्र पार्टीका सभापति रवि लामिछानेले जाँचबुझ आयोगलाई भदौ २४ को घटनामा राष्ट्रिय स्वतन्त्र पार्टी संलग्न नरहेको बताएको पाइएको छ। भदौ २३–२४ को घटना छानबिनका लागि गठित आयोगमा बयान दिँदै लामिछानेले आफू र आफ्नो विध्वंसात्मक घटनामा संलग्न नभएको बताएका हुन्।

उनले भदौ २४ गते आफू नख्खु कारागारबाट नभागेको जिकिर गरेका छन्। कारागार प्रशासनका सुरक्षा अधिकारी र अरु कर्मचारीले सुरक्षाका कारण आफूलाई कारागार बाहिर गइदिन भनेको उनको दाबी छ।आफूलाई कारागार प्रशासनकै निर्देशनमा भीडको जिम्मा लगाइएको भन्दै उनले निस्कन नचाहँदा नचाहदै जबर्जस्ती बाहिर पठाइएको जिकिर गरेका हुन्।

‘मैले अदालतको आदेश बिना कारागारबाट बाहिर निस्कन अस्वीकार गरेँ। प्रहरी आत्तिएको अवस्थामा भीडले मलाई धकेल्दै बाहिर पुर्‍यायो’ उनले बयानमा भनेका छन्, ‘त्यसपछि म कारागार छेउको रेस्टुरेन्टको बार्दलीमा चढी भीडलाई शान्ति, संयमता अपनाउन र सार्वजनिक सम्पत्तिको संरक्षण गर्न अपिल गर्दै सम्बोधन गरेँ।’