कार्की आयोग प्रतिवेदन- ६३ जनाको शव मध्ये ४८ जनाको गोली लागि मृत्यु पुष्टि

काठमाडौं। भदौ २३ र २४ गते भएको जेनजी आन्दोलनमा भएको क्षति र सुरक्षा कमजोरीबारे जाँचबुझ गर्न बनेको गौरीबहादुर कार्की नेतृत्व आयोगको प्रतिवेदनले ६३ जनाको शव मध्ये ४८ जनाको गोली लागि मृत्यु पुष्टि भएको देखाएको छ।

प्रतिवेदनमा मृतकको पहिचान भएकोमा ६३ जना मृतकका शव परीक्षण प्रतिवेदन आयोगमा प्राप्त भएकोमा मृतकका शव परीक्षण प्रतिवेदन विश्लेषण गर्दा प्रमुख रुपमा गोली लागि मृत्यु भएको पाइएको उल्लेख छ।

प्रतिवेदनमा भनिएको छ,‘परीक्षण गरिएका ६३ जनाको शव मध्ये ४८ जनाको गोली लागि मृत्यु भएको पुष्टि भएको देखिन्छ, तीमध्ये छातीमा २० जना, टाउकोमा १४ जना, घाटीमा ५ जना, पेटमा ४ जना, तथा नितम्ब मा १ जना, फोक्सो, छाती तथा घाटी, काँध र जांघमा एकएक जनाको गोली लागि मृत्यु भएको देखिन्छ।’

यसका अलावा आगलगीबाट ८ जना, चोटपटकका कारण ५ जना तथा विस्फोटनका कारण १ जनाको मृत्यु भएको देखिन्छ। साथै १ जनाको मृत्युको कारण निर्धारण हुन नसकेको समेत शव परीक्षण प्रतिवेदनवाट देखिएको प्रतिवेदनमा उल्लेख छ।