एमालेको निष्कर्ष : राजतन्त्र फर्काउने प्रयास कुनै पनि हालतमा सफल हुँदैन

काठमाडौं। नेकपा एमालेको सचिवालय बैठकले विशेष प्रस्ताव पारित गरेको छ । पार्टी कार्यालय च्यासलमा बसेको बैठकले राजतन्त्र फर्काउने प्रयास कुनै पनि हालतमा सफल नहुने प्रस्ताव पारित गरेको हो।

यस्तै प्रतिक्रियावादी शक्तिहरूले बेमौसमको बाजा बजाएर सत्तामा जाने भर्‍याङ बनाउन खोजेको तर, यसको अर्थ नरहने एमालेको दाबी छ ।

राजतन्त्र र लोकतन्त्रसँगै जान सक्दैनन् भन्ने निष्कर्षका साथ ऐतिहासिक संविधानबाट संघीय लोकतान्त्रिक गणतन्त्र स्थापना भएको स्मरण गर्दै गणतन्त्र र संविधानप्रति भइरहेका सुनियोजित घटनाक्रमप्रति एमालेको ध्यानाकर्षण भएको पार्टी उपमहासचिव प्रदीप ज्ञवालीले बताए ।

ज्ञवालीका अनुसार बैठकमा मुलुकलाई पश्चगामी दिशामा फर्काउने कुनै पनि प्रयास सफल हुन नसक्ने भन्दै नेपाली जनताको सात दशक लामो बलिदानी सङ्घर्षबाट ल्याएको यो व्यवस्थालाई आँच आउने कुनै गतिविधिमाथि सरकार र एमालेले खेद प्रकट गर्ने बताए।

‘जनताको यो फैसला उल्ट्याउने र मुलुकलाई पश्चगामी दिशामा फर्काउने कुनै पनि प्रयास सफल हुन सक्दैन,’ एमालेले पारित गरेको विशेष प्रस्ताव पढ्दै ज्ञवालीले भने, ‘‘लोकतान्त्रिक गणतन्त्र नेपाली जनताको सात दशक लामो बलिदानी संघर्षको परिणति हो ।’

उनले लोकतान्त्रिक गणतन्त्र नेपाली जनताको सात दशक लामो बलिदानी सङ्घर्षको परिणतिलाई उल्टाउने काममा कसैले पनि हात नहाल्न आग्रह गरे ।