३६ वर्षपछि सिंगापुरविरुद्ध नेपालको जित

काठमाडौं । जिलेस्पीजंग कार्कीले पहिलो हाफमा गरेको गोल नै निर्णायक बन्दा नेपालले अन्तर्राष्ट्रिय मैत्रीपूर्ण खेलमा घरेलु टोली सिंगापुरविरुद्ध १-० को जित निकालेको छ ।

शुक्रबार सिंगापुर राष्ट्रिय रंगशालामा जिलेस्पीले १२औं मिनेटमा गोल गरेका थिए । नेपालले पहिलो पटक सिंगापुरविरुद्ध जित हात पारेको हो ।

नेपाल र सिंगापुर सन् १९८९ पछि एक अर्काविरुद्ध मैदान उत्रिएका थिए । विश्वकप छनोट अन्तर्गत १९८९ मा भएको पछिल्लो भेटमा नेपाल ७(० ले पराजित भएको थियो । यसैगरी सन् १९८९ मै विश्वकप अन्तर्गतकै खेलमा पनि नेपाल ३-० ले पराजित भएको थियो ।

त्यसअघि सन् १९८२ को किंग्स कपमा नेपालले सिंगापुरसँग २-० को हार बेहोरेको थियो । नेपालले एएफसी एसिया कप छनोटको तयारी स्वरुप सिंगापुरसँग मैत्रीपूर्ण खेल खेलेको हो । नेपालले मंगलबार मलेसियाको सामना गर्नेछ ।